كاركردن لە پڕۆژەی یەكتربڕی باخی بەختیاری بەردەوامە، لە کاتێکدا بڕیار بوو ئەمڕۆ کارەکانی تەواوبکرێت سەرۆکی شارەوانی سلێمانیش دەڵێت، ” ئێمە پەنامان بردووەتە بەر یاسا بۆئەوەی گرفتەکان چارەسەرببن”.
بەپێی زانیارییەکان كاركردن لە پرۆژەكەدا بە سێ قۆناغ ئەنجامدەدرێت، قۆناغی یەکەم و دووەم تەواوبووە، قۆناغی سێیەمی ماوە، تا ئێستا کارەکان نەوەستاون بەڵكو رێگری لە ئەنجامدانی كاری قیركردنی بەشێكیدا هەیە و لە هەوڵی چارەسەركردنیداین.
لەیلا عومەر، سەرۆکی شارەوانی سلێمانی لە کۆنگرەیەکی ڕۆژنامەوانیدا ڕایگەیاند، “دەبوایە ئێستا پڕۆژەکە تەواو ببوایە، بەڵام بەهۆی ڕێگرییەکانەوە نەتوانراوە تەواوبکرێت، ئێستا خەریکی لێکۆڵینەوەکانین و بەپێی بەڵگەنامە یاساییەکان ئەو زەوییە موڵکی حکومەتە و هیچ کەسێکی دیکە مافی خاوەندارێتی کردنی نییە “.
پرۆژەی یەكتربڕی باخی بەختیاری ٪٩٠ی كارەكانی تەواو بووە، ئەگەر رێگری و ئاستەنگ نەیەتە پێشەوە تا مانگی ئاداری داهاتوو بە تەواوی ئامادە دەبێت، لە کاتێکدا تا ئێستا دووجار ئاستەنگی بۆ دروستکراوە
هاوکات کارەکانی پڕۆژەی یەكتربڕی باخی بەختیاری ماوەی ساڵێک و سێ مانگە دەستیپێکردووە، کە بریتییە لە دوو ئەندەرپاس و لەلایەن كۆمپانیای دەروازەی گەرمیان و بە سەرپەرشتیی شارەوانیی سلێمانی بە گوژمەی ١٢.٥ ملیار دینار ئەنجامدەدرێت.
