حکومەتی هەرێمی کوردستان ڕایگەیاند، دادوەرێكی بەناوبانگی ئەمریكی، دەڵێت: لە ڕووی دەستوورییەوە، حکومەتی هەرێمی کوردستان مافی تەواوی لە بەرهەمهێنان و بەڕێوەبردنی کەرتی نەوت و غازدا هەیە.
ئەمڕۆ پێنجشەممە، ماڵپەڕی فەرمی حکومەتی هەرێمی کوردستان شیکارییەکی یاسایی دادوەر ستیڤن شوێبڵی ئەمریکی بڵاوکردەوە کە تێیدا “پشتگیریی تەواوی مافە دەستوورییەکانی حکومەتی هەرێمی کوردستان دەکات سەبارەت بە بەرهەمهێنان و بەڕێوەبردنی کەرتی نەوت و غاز”.
ڕوونیشیکردەوە کە “ئەم بۆچوونەی دادوەر شوێبڵ کە پشتبەستوە بە تێگەیشتنێکی ورد لە یاسای نێودەوڵەتی و دەستووری عێراق، جەخت لەسەر مافی ڕەوا و دەسەڵاتی یاسایی و دەستووریی حکومەتی هەرێم دەکاتەوە بۆ بەڕێوبردنی سەرچاوە نەوتی و غازییەکانی”.
شوێبڵ بە وردی دەستووری عێراقی ساڵی ٢٠٠٥ شی دەکاتەوە و جەخت لەوە دەکاتەوە هەرێمەکان، وەکو هەرێمی کوردستان دەسەڵاتی بەڕێوەبردنی سامانە سروشتییەکانیان هەیە لەڕێی لێلکدانەوەی ماددەکانی ١١٠ و ١١٤ و ١١٥ و ١٢١ ی دەستوور کە بە کۆی گشتی، دەسەڵاتی نەوت و غاز نادات به حکومەتی فیدراڵی، بەڵکو ئەم ماددانە ڕێگە بە هەرێمەکان دەدەن کۆنترۆڵی چۆنیەتیی بەرهەمهێنانی نەوت و غاز لە ناوچەکانی خۆیان بکەن.
لە هەواڵەکەی ماڵپەڕی حکومەتی هەرێمدا هاتووە کە “دادوەر شوێبێل شیکارییەکی وردی بۆ بڕیارەکەی ساڵی ٢٠٢٢ ی دادگای باڵای فیدراڵیی عێراق کردووە کە تیایدا یاسای نەوت و گازی حکومەتی هەرێمی کوردستانی ساڵی ٢٠٠٧ ی بە نادەستووری لە قەڵەم دا. دادوەر شوێبڵ دژی ئەم بڕیارەی دادگای فیدراڵیی عێراقە و پێی وایە کە حکومەتی هەرێمی مافی دەستووریی خۆیەتی یاسا و ڕێسا بۆ کەرتی نەوت و غاز دابنێت”.
ئەوەشی خستەڕوو کە دادوەر شوێبڵ هاوڕای بیروبۆچوونەکانی پرۆفیسۆر جەیمس کراوفۆرد-ە لەبارەی مافی حکومەتی هەرێمی کوردستان بۆ بڕیاردان لەسەر گەڕان بەدوای نەوت و دەرهێنانی کە بێگومان ئۆتۆنۆمییەکی زیاتر دەبەخشێت بە هەرێمی کوردستان.
ڕاشیگەیاند، بۆچوونە یاساییەکانی دادوەر شوێبڵ پشتگیری تەواوە لە مافە دەستوورییەکانی هەرێمی کوردستان کە ڕێگە خۆش دەکات بۆ حوکمڕانییەکی بەهێز و سەربەخۆ لە بەڕێوبردنی سەرچاوە نەوتی و غازییەکانیان.
ستیڤن ئێم شوێبڵ یاساناسێکی ئەمریکی و ڕاوێژکار و دادوەرێکی نێودەوڵەتییە. پلە و پۆستی گرنگ و جۆراوجۆری هەبووە، وەک دادوەری دادگای کارگێڕیی بانکی نێودەوڵەتی (٢٠١٠-٢٠١٧)، ئەندامی گرووپی نیشتمانیی ئەمریکا لە دادگای ناوبژیوانیی هەمیشەیی، سەرۆکی دادگای کارگێڕیی سندوقی دراوی نێودەوڵەتی (١٩٩٣-٢٠١٠ )، سەرۆکی دادگای دادوەریی نێودەوڵەتی (١٩٩٧-٢٠٠٠)، جێگری سەرۆکی دادگای دادوەریی نێودەوڵەتی (١٩٩٤-١٩٩٧)، و دادوەری دادگای دادوەریی نێودەوڵەتی (١٩٨١-٢٠٠٠).
پێش ئەوەی لە دادگای نێودەوڵەتیدا دەست بەکار بێت، شوێبڵ وەک جێگری ڕاوێژکاری یاسایی وەزارەتی دەرەوەی ئەمریکا (١٩٧٤-١٩٨١) کاری کردووە. هەروەها وەک یاریدەدەری ڕاوێژکاری یاسایی وەزارەتی دەرەوەی ئەمریکا (١٩٦١-١٩٦٧) کاری کردووە. دادوەر شوێبڵ پرۆفیسۆری یاسا بووە لە سکوڵی یاسای هارڤارد (١٩٥٩-١٩٦١) و زانکۆی جۆنز هۆپکینز (١٩٦٧-١٩٨١).
لێرەدا تەواوی دەقی شیکارییەکەی دادوەر شوێبێل دەخەینەڕوو، بەناونیشانی ”دەسەڵاتی حکومەتی هەرێمی کوردستان بەسەر نەوت و گازدا بەپێی دەستووری عێراق“.
https://drive.google.com/file/d/1SAB-9axfCv1L1JoLjMdODzCE9iDDs8iV/view
