جێگری سەرۆکوەزیران پێشوازیکرد لە باڵیۆزی تورکیا لە عێراق و لە کۆبوونەوەی نێوانیاندا چەند پرسێکی جێی بایەخی ھەردوولا تاوتوێ کران.
رۆژی سێ شەمە، ٢٨ی تشرینی دووەمی ٢٠٢٣ لە ھەولێر، قوباد تاڵەبانی لەگەڵ مەولود یاکوت کونسوڵی گشتیی تورکیا لە ھەرێم کۆ بووەوە و ، باسی دۆخی عێراق بە گشتی و پەیوەندییەکانی نێوان ھەرێم و بەغدا بە تایبەتی کرا.
قوباد تاڵەبانی جەختی کردەوە لەسەر چارەسەرکردنی کێشەکانی نێوان ھەرێم و بەغداد لەڕێی گفتوگۆوە و رایگەیاند، یەکگرتوویی لایەنە سیاسییەکانی ھەرێم و چارەسەرکردنی کێشە ناوخۆییەکان کاریگەری دەبێت لەسەر چارەسەرکردنی کێشەکانی نێوان ھەرێم و بەغدا.
لە بەشێکی دیکەی کۆبوونەوەکەدا تاوتوێی ھەڵبژاردنەکانی ئەنجومەنی پارێزگاکانی عێراق و بە تایبەتیش ھەڵبژاردنەکان لە کەرکوک کرا، ھەردوولا ھیوایان خواست ھەڵبژاردنەکان لە کەشێکی ئارام و بێ کێشەدا بەڕێوەبچێت و ئەنجامەکەی لە بەرژەوەندی ھەموو خەڵکی عێراقدا تەواو ببێت.
لە تەوەرێکی دیکەی کۆبوونەوەکەدا باسی پرسی ھەناردەکردنەوەی نەوتی ھەرێم و کێشەی بەشە بودجەی ھەرێم کرا.
قوباد تاڵەبانی ھیوای خواست بە زوویی ھەناردەکردنەوەی نەوتی ھەرێم دەست پێ بکاتەوە، راشیگەیاند، پێویستە لەنێوان ھەرێم و بەغداد رێککەوتنێکی گشتگیر و درێژخایەن بکرێت، کە تیایدا بەشی زۆری کێشەکانی نێوان ھەردوولا چارەسەر بکرێت و کێشەی بودجەی ھەرێم بەشێوەیەکی بنەڕەتی چارەسەر بکرێت.
