ئێران بۆ ئەمریکا: بنکەسەربازییەکانتان لەژێر دەستماندایە

وتەبێژو سوپای پاسدارانی ئێران هۆشداری دەداتە ئەمریکا و ڕایدەگەیەنێت بنکە سەربازییەکانتان لەژێر دەست و چاودێری ئێراندان.

ئەمڕۆ شەممە لە کۆنفارنسێکی ڕۆژنامەوانیدا، ڕەمەزان شەرف ئەفسەری پلە باڵا و وتەبێژی هێزەکانی سوپای پاسدارانی ئێران ڕایگەیاند، ئەگەر هێرش و بۆمببارانی سەرکەرتی غەززە درێژە بکێشێت ناوچەکە دەتەقێتەوە، ئاماژەی بەوەشکرد، پێویستە لەسەر هەموو ئەوانەی هاوکاری دەوڵەتی ئیسرائیل دەکەن بەتایبەتی ئەمریکا ئەوە بزانن بەردەوامیدان بەکوشتنی هاوڵاتیانی مەدەنی دەبێتەهۆی کۆتاییهێنان و پچڕانی سەبر و دانبەخۆداگری موسوڵمانان لە هەرچرکەیەکدا.

باسی لەوەشکرد، ئێران لەتوانایدایە ڕووبەڕووی ئەمریکا ببێتەوە، وتیشی پێویستە لەسەر ئەوانەی هاوکاری قەوارەی جولەکە دەکەن و دەستیان ناگاتە ئیسرائیل ئەوا دەستیان دەگاتە بنکە و بارەگا سەربازییەکانی ئەمریکا کە ئەم جەنگەی دەوێت.

دەشڵێت، ویلایەتە یەکگرتووەکانی ئەمریکا یەکەمین هاوکاریکاری قەوارەی جولەکەیە و پارێزگارییەکی تەواو لەو قەوارەیە دەکات، وتیشی، هەموو بنە سەربازییەکانی ئەمریکا و گەشتە ئاسمانییەکانیان لەژێر کۆنترۆڵ و چاودێری ئێراندان و “چاودێریکردن و بەدواداچوون بۆ دابینکردنی بۆمب لەلایەن ئەمەریکاوە بۆ زایۆنییەکان دەکەین.”