ڕێبەری باڵای شۆڕشی ئیسلامی ئێران لەگەڵ ڕەتکردنەوەی ئەگەری تێوەگلانی وڵاتەکەی لە هێرشەکەی سەر ئیسرائیل ڕایگەیاند، دەست و بازووی ئەنجامدەرانی ماچ دەکەم.
ئەمڕۆ سێشەممە، عەلی خامنەئی ڕێبەری باڵای شۆڕشی ئیسلامی ئێران بەشداری لە ئاهەنگی دەرچوونی ئەفسەرانی هێزە چەکدارەکانی وڵاتەکەی کرد و وتارێکیشی پێشکەش کرد.
خامنەئی لە وتارەکەیدا باسی لە هێرشەکەی شەممەی ڕابردوو کرد کە چەکدارانی حەماس کردیانە سەر چەندین ئامانجی مەدەنی و سەربازی ئیسرائیل و ڕایگەیاند، “ئەو بوومەلەرزە کاولکارەی ڕۆژی شەممە ڕوویدا، شکستێکی هەواڵگری و سەربازی قەوارەی زایۆنی بوو کە چاك ناکرێتەوە”.
وەك ئاماژەدانیش بۆ ڕەتکردنەوەی ئەو دەنگۆیانەی باس لە تێوەگلانی ئێران لە هێرشەکان دەکەن، عەلی خامنەئی وتی: “ئەوانەی دەڵێن داستانەکە بەرهەمی دەرەوەی فەڵەستینییەکانە، بەهەڵەداچوون”.
ڕێبەری باڵای شۆڕشی ئیسلامی ئێران وتیشی: “دەست و بازووی ئەو شارەزا و زیرەك و لاوانە ماچ دەکەم” کە هێرشەکەیان ئەنجام داوە.
لە ڕۆژی شەممەوە تا ئێستا هەزار ئیسرائیلی و زیاتر لە 700 فەڵەستینی کوژراون، ئەم جگە لەو کوژرانی زۆربەی ئەو چەکدارە فەڵەستینییانەی چوونە ناو خاکی ئیسرائیل و هێرشەکەیان ئەنجام دا.
