ئەمڕۆ چوارشەممە، ئێریک ئادەمز، سەرۆکی شارەوانی نیویۆرک لە ئەمریکا ڕایگەیاند، بانگدان بۆ نوێژی موسڵمانان لە مزگەوتەکان ڕێگەپێدراوە و پێویست بە مۆڵەت ناکات.
ئێریک ئادەمز ئاماژەی بەوەشکرد، بەپێی یاسا نوێیەکان مزگەوتەکان پێویستیان بە مۆڵەتی تایبەت نابێت بۆ بانگەوازی نوێژ “بانگدان” لە منارەی مزگەوتەکانەوە بە ئاشکرا لە ڕۆژانی هەینی و لە کاتی خۆرئاوابوون لە مانگی ڕەمەزانی پیرۆزدا.
ئاماژەی بەوەشکرد، فەرمانگەی کاروباری کۆمەڵایەتی بەشی پۆلیس لەگەڵ مزگەوتەکان کاردەکات بۆ گەیاندنی ڕێنماییە نوێیەکان و دڵنیابوون لەوەی ئەو ئامێرانەی کە بۆ پەخشکردنی بانگەوازی نوێژ بەکاردەهێنرێن لەسەر ئاستێکی گونجاو دانراون.
ئیریک ئادەمز وتیشی: “بۆ ماوەیەکی زۆرە هەست بەوەدەکرا کە کۆمەڵگاکانمان ڕێگەی نەدەدا بانگەوازی نوێژ پەخشبکرێت و بە ئاشکرا بانگ بدرێت، بەڵام ئێمە ئەمڕۆ ئەو هێڵە سوورە دەبڕین، زۆر بە ڕوونی دەڵێین مزگەوت و شوێنەکانی عیبادەت ئازادن لەوەی بانگبدەن، لە کاتی نوێژی هەینی و لە مانگی ڕەمەزاندا بەبێ ئەوەی پێویست بە وەرگرتنی مۆڵەت بکات.”
سەرۆکی شارەوانی شارەکە لە کۆنگرەیەکی ڕۆژنامەوانیدا وتی، موسڵمانانی نیویۆرک لە سێبەری خەونی ئەمریکیدا ناژین لەکاتێکدا من سەرۆکی شارەوانی نیویۆرکم.
