خەوتن یەکێکە لە گرنگترین ئەو شتانەی کاریگەرییان لەسەر تەندروستی، دڵخۆشی و ژیانی مرۆڤ هەیە، پسپۆڕان و پزیشکان رایدەگەیەنن خەوێکی باش بەتایبەتی خەوتن لە کاتژمێرەکانی سەرەتای شەودا کاریگەرییەکی گەورە و گرنگی هەیە لەسەر ژیانی مرۆڤەکان.
ماڵپەڕی “The Health” ئاماژەی بەوەکردووە، چەندین توێژینەوە و لێکۆڵینەوەی زانستی باسی کاریگەری و گرنگی زوو خەوتن لەسەرەتای شەودا دەکەن لەوانەش تەندروستی جەستە و مێشک و جێبەجێکردنی ئەرکەکانی مرۆڤ لەکاتی ڕۆژدا.
توێژینەوەکان سوودەکانی زوو خەوتن لەچەندخالێکدا دەخەنەڕوو ئەوانیش بریتین لە:
یەکەم: کارکردنی مێشک بەشێوەیەکی تەندروست و بەرزی هێزی تەرکیزی مێشکی مرۆڤەکان.
دووەم: تەندروستی گشتی جەستە، زوو خەوتن دەبێتەهۆی پاراستنی تەندروستی دڵ و سیستمی خوێن و بەدوور گرتنی مرۆڤەکان لە نەخۆشییە درێژخایەنەکانی وەک بەرزی فشاری خوێن و شەکرە.
سێیەم: خەوێکی باش و زوو خەوتن دەبێتەهۆی پاراستن و ڕاگرتنی هەست و سۆزت لەکاتێکدا پێچەونەکەی دەبێتە هۆی تێکدانی لایەنی سۆزداری و هەستەکانت.
چوارەم: ڕێکخستنی هۆرمۆنەکان یەکێکیدیکەیە لەو خاڵە گرنگانەی کە مرۆڤەکان بەهۆی خەوێکی باش و زوو خەوتنەوە دەستیان دەکەوێت وەک هۆرمۆنەکانی گەشەکردن و هۆرمۆنەکانی ڕێکخستنی سیستمی خۆراکی کە کاریگەرییەکی گەورەیان هەیە لەسەر گەشەکدرن و تەندروستی گشتی مرۆڤەکان.
پێنجەم: زوو خەوتن و زوو لەخەو هەستان دەبێتە مایەی هەبوونی کاتێکی زۆرتر بۆ راپەڕاندنی کارەکانت لەکاتی ڕۆژدا ئەمەش دەبێتەهۆی یارمەتیدانی مرۆڤەکان هەتا بەرهەمدارتربن.
شەشەم: زوو خەوتن یارمەتی مرۆڤەکان دەدات زیاتر هەست بە حەوانەوە بکەن، خەوتن لە کاتژمێرەکانی کۆتایی شەو یاخود ڕۆژدا هەرگیز قەرەبووی کاتژمێرەکانی سەرەتای شەو ناکەنەوە.
حەوتەم: خەوتن لەسەرەتای شەودا بەشدارە لە ڕاگرتنی جەستە بەشێوەیەکی تەندروست وەک ئەوەی وەرزش و نانخواردن لەکاتی خۆیدا بەشدارن لە پاراستنی تەندروستی مرۆڤدا.
هەشتەم: لە جەستەی هەرمرۆڤێکدا کاتژمێرێک هەیە بە کاتژمێری بایۆلۆجی ناودەبرێت کە بەرپرسە تەندروستییەکی باش و ئەم کاتژمێرە پەیوەست بە شێوازی ژیانی کەسەکە کاردەکات، بۆماوەیەکی زۆر زوو خەوتن یان درەنگ خەوتن کاتژمێری بایەلۆجی جەستە کاری لەسەر دەکات و دەبێتە سوڕی ژیانی مرۆڤەکە و ناتوانێت بە ئاسانی دەستبەرداری ئەو خووە ببێت ئەمەش کاریگەری لەسەر کۆئەندامی هەرسی مرۆڤەکان دەبێت ئەگەر تێک بدرێت.
