وەزارەتی دارایی عێراق دەستپێکردنی ڕێکارەکانی دابینکردنی دارایی مووچەی خانەنشینانی بۆ مانگی ئاب ڕاگەیاند، هاوکات دەستەی خانەنشینی نیشتمانی دەستیکرد بە پێدانی مووچەی خانەنشینانی مەدەنی و سەربازی.
وەزارەتی دارایی عێراق لە بەیاننامەیەکدا ڕایگەیاندووە، “بەشی ژمێریاری لە وەزارەتەکە دەستیکردووە بە دابینکردنی بودجەی مووچەی خانەنشینانی مەدەنی و سەربازی بۆ مانگی ئاب”.
وەزارەتەکە داوای لە ئیدارەی بانکەکانی ڕافیدەین و ڕەشید و دەستەی خانەنشینی نیشتمانی کردووە بۆ “خێراکردنی تەواوکردنی ڕێکارەکانی پێدانی مووچەی خانەنشینانی مەدەنی و سەربازی لە ڕێگەی کارتی پارەدانی ئەلیکترۆنیەوە”.
ئاماژەی بەوەشكردووە، “هەموو خانەنشینانی مەدەنی و سەربازی، کە نامەی کورت وەردەگرن، پێداچوونەوە بە لقی بانکەکان و شوێنەکانی گواستنەوەی ئەلیكترۆنی لە بەغدا و پارێزگاکان بکەن، بۆ وەرگرتنی مووچەکانیان”.
هاوكات، هەردوو بانكی ڕەشید و ڕافیدەین لە بەیاننامەی جیادا دەستپێكردنی دابەشكردنی مووچەی مانگی ئاب-یان ڕاگەیاند.
ئەمە لەكاتێكدایە، كە تا ئێستا مووچەخۆرانی هەرێم مووچەی مانگی 6 و 7یان وەرنەگرتووە و حكومەتی هەرێمیش دەیخاتە ئەستۆی بەغدا و ڕایدەگەیەنێت، كە پابەندی یاسای بودجە بوون و چاوەڕێن بەغدا پارە ڕەوانەی هەرێم بكات.
