ئەمشەو لە یارییە دۆستانەكاندا، ئەڵمانیا میوانداریی بەلجیكا دەكات و ئەرجەنتینیش ڕووبەڕووی كۆراساو دەبێتەوە.
لە یارییە دۆستانەكانی هەڵبژاردەكان و لە هەفتەی فیفا، ئەمشەو كاتژمێر 9:45، هەڵبژاردەی ئەڵمانیا لەسەر خاكی خۆی ڕووبەڕووی هەڵبژاردەی بەلجیكا دەبێتەوە.
لە 25ی ئەم مانگە و لە یارییەكی دۆستانەدا، هەڵبژاردەی ئەڵمانیا لەگەڵ هەڵبژاردەی پیرۆ یاریی كرد و توانی بە دوو گۆڵی بێ بەرامبەر یارییەكە بباتەوە.
هەر لە هەفتەی فیفادا، درەنگانی ئەمشەو هەڵبژاردەی ئەرجەنتین لەسەر خاكی خۆی بەرامبەر هەڵبژاردەی كۆراساو یاری دەكات و هەردوو هەڵبژاردەی مەغریب و پیرۆش ڕووبەڕووی یەكدەبنەوە.
یارییەكەی ئەمشەوی “تانگۆ”ی پاڵەوانی جیهان، بە دووەم یاریی هەڵبژاردەكە لە دوای مۆندیال و لە ماوەی چوار ڕۆژدا دادەنرێت، ئەرجەنتین لە یەكەم یاریدا بە دوو گۆڵی بێ بەرامبەر بەسەر هەڵبژاردەی پەنەمادا سەركەوت.
