بڕیارە بافڵ جەلال تاڵەبانی، سەرۆكی یەكێتیی نیشتمانیی كوردستان لەگەڵ سەرۆك و كەسی یەكەمی حزبەكانی هەرێم لە دوكان كۆببێتەوە بۆ گفتوگۆ كردن لەسەر دۆخی عێراق و هەرێمی كوردستان.
لە ماوەی ڕابروودا شاندێكی باڵای یەكێتی سەردانی بەشێكی لایەنە سیاسییەكانی هەرێمی كوردستانیان كرد و تیایدا گفتوگۆ كرا لەسەر پەیوەندییەكانی هەرێم لەگەڵ عێراق و دۆخی حكومڕانی لە هەرێم، كە یەكێتی نیگەرانە لە كەمی داهات و خزمەتگوزارییەكان لە سنووری سلێمانی و هەڵەبجە و گەرميان و ڕاپەڕین.
سەرچاوەیەكی ئاگادار بۆ (خەڵك) ڕایگەیاند، بڕیارە ڕۆژی پێنج شەممە لە هاوینە هەواری دوكان، بافڵ تاڵەبانی، سەرۆكی یەكێتی لەگەڵ ئەو لایەنە سیاسییانە كۆببێتەوە، كە پێشتر سەردانيان كردوون و بۆ ئەوەش بانگهێشتنامەی فەرمی ئاڕاستە كردوون.
ڕاشیگەیاند، پێمان وایە، هەر كۆبوونەوەیەك لەنێوان لایەنە سیاسییەكان ئەنجام بدرێت، كە ئامانج لێی هێوركردنەوەی ناكۆكی نێوان لایەنەكانە، كۆبوونەوە و دەستپێشخەرییەكی باشە و لەوەش گرنگتر ئەوەیە دەرئەنجامی كۆبوونەوەكە ببێتە هۆی كۆتایی هێنان بە گرژییەكان و ڕێكبكەون لەسەر ستراتیجێكی نیشتمانی.
ئەو سەرچاوەیە ئاشكراشی كرد، ئەجێندای كۆبوونەوەكە بۆ قسەكردنە لەسەر كێشەكانی هەرێمی كوردستان و كێشە سیاسییەكانی عێراقە.
وتیشی، “ئەوەی بیستومانە، پارتی دوای كۆنگرە دەستپێشخەرییان هەیە و دەیانەوێت كۆببنەوە لەگەڵ هێزەكان و بەتایبەتیش كۆبوونەوەی لوتكەی پارتی و یەكێتی، بۆیە ئەگەر كۆبوونەوەكان بۆ كۆتایی هێنان بە گرژی نێوان ئەو دوو حزبە بێت كۆبوونەوەیەكی ئەرێنی دەبێت”.
