دەستگیركردنی زیاتر لە 150 كەس بەتۆمەتی دزیكردن لە ناوچەی بومەلەرزەكە لە توركیا ڕادەگەیەنرێت.
كەناڵی “TRT”ی توركی بڵاویكردەوە، زیاتر لە 150 كەس دەستبەسەركراون كە گومانیان لێدەكرێت تێوەگلابن لە كاریی دزی و تاڵانی لەو ناوچانەی بومەلەرزەكانیان تێدا بوو لە توركیا.
كاناڵەكە لە زاری بەرپرسانی وەزارەتی دادی توركیاوە بڵاویكردەوە”لە 319 ڕووداوی لەوجۆرە كە لێكۆڵینەوەیان تێدا كرا، 234 كەس دەستگیركران و لە دوای لێكۆڵینەوەش 152 كەسيان دەستبەسەركران”.
لە 6ی ئەم مانگەدا دوو بومەلەرزە بە گوڕی 7.7. پلە و 7.6 پلە، باشووری توركیا و باكووری سوریایان هەژاند و بوونە مایەی گیان لەدەستدانی دەیان هەزار كەس و برینداربوونی زیاتر لە 100 هەزار كەسی تر، وێڕای داڕوخان و وێرانبوونی لەسەدا 50ی تەلار و باڵەخانەكانی ناوچەكە.
