بەپێی ڕاپۆرتە كەشناسییەكان، ئەو شەپۆلە سەرمایەی ناوچەكانی هەرێمی كوردستانی گرتۆتەوە كۆتایی دێت و پلەكانی گەرما ڕووو لە بەرزبوونەوە دەكەن و لە هەندێك ناوچە دەگاتە 23 پلەی سەدی.
ئاراس جەبار، شارزای كەشناسی بۆ (خەڵك) ڕایگەیاند، کاتەکانی ئەمشەو بۆ بەرەبەیانی سبەی پێنج شەممە ١٦-٢-٢٠٢٣ بەفر و بارانێکی کەم و ماوە کورت بەشێکی ناوچەکانی سنوری پارێزگای سلێمانی و ھەڵەبجە و ئیدارەی ڕاپەرین و ناوچە شاخاوییەکانی ڕۆژھەڵاتی پارێزگای ھەولێر دەگرێتەوە بۆ سبەی نیوەڕۆ کۆتایی پێدێت، بەڵام کاریگەری بارستە ھەوا ساردەکەی باکوری ناوچەکە تا ڕۆژی ھەینی ١٧-٢-٢٠٢٣ بەردەوامی ئەبێت و پلەکانی گەرما بە جێگیری ئەمێنێتەوە .
ڕاشیگەیاند، لەسەرەتای ھەفتەی ئایندەوە ڕۆژی شەممە ١٨-٢-٢٠٢٣ لە ئەنجامی درێژبوونەوەی بەرزە پاڵەپەستۆیەکی ژێر گەرم لە ڕۆژئاوا و ناوەڕاستی ئەوروپاوە بۆ سەر تەواوی ناوچەکانی ڕۆژھەڵاتی ناوەڕاست، لە ئەنجامدا کاریگەری ئەو بارستە ھەوا ساردانەی ماوەیەکی زۆرە لەباکوری ناوچەکە جێگیر بووە دەکشێتەوە بۆ سەرەوە و پلەکانی گەرما لە ڕۆژی شەممەوە تا کۆتایی ھەفتە ڕۆژی پێنج شەممە ٢٣-٢-٢٠٢٣ ڕۆژانە چەند پلەیەک بەرزبوونەوە بەخۆیەوە ئەبینێت.
وتیشی، “کەشوھەوا لەو ماوەیەدا بەشێوەیەکی گشتی سەقامگیر ئەبێت و لەناوچە نزمەکاندا کەشێکی بەھارەی ئەبێت بەتایبەت لە ناوەڕاست و کۆتایی ھەفتەکەدا”.
ئاماژەی بەوەشكرد، بەرزترین پلەکانی گەرما پێشبینی دەکرێت لەسەنتەری پارێزگای ھەولێر و کەرکوک بگاتە نێوان ١٨ تا ٢٠ پلەی سەدی و لەسەنتەری پارێزگای ھەڵەبجە و سلێمانی و دھۆک ١٥ تا ١٨ پلە ، لەناوچەکانی سنوری ئیدارەی گەرمیان ٢٠ تا ٢٣ پلە ، لەسنوری ئیدارەی ڕاپەرین ١٥ تا ١٧ پلە.
