ئەمڕۆ لیژنەی دارایی ئەنجومەنی نوێنەرانی عێراق، بانگهێشتی تەیف سامی وەزیری دارایی عێراق دەکات و لەبارەی مووچە و بودجەی ھەرێم داوای ڕوونکردنەوەی لێدەکات.
جەمال کۆچەر، ئەندامی لیژنەی دارایی لە ئەنجومەنی نوێنەران ڕایگەیاند، لیژنەکەیان میوانداری تەیف سامی، وەزیری دارایی عێراق دەکات و لەبارەی مووچە و بودجەی ھەرێم داوای ڕوونکردنەوەی لێدەکەن.
ئاماژەی بەوەشکرد، تەوەرێکی دیکە تایبەت دەبێت بە پرسی دەروازە سنوورییەکان و باج و لەوبارەیەشەوە ئەندامانی لیژنەی دارایی داوای ڕوونکردنەوە لە وەزیری دارایی دەکەن.
ئەمەش لە کاتێکدایە، دوێنێ وەزارەتی دارایی هەرێم لە ڕوونكردنەوەكەیدا ئاماژەی بەوەكرد، ئەم ڕێكارەی وەزارەتی دارایی حكومەتی فیدڕاڵی وایكردووە كورتهێنان لە پێدانی مووچەی هەرێم بۆ مانگی شوبات بە نزیكەی ( ٣٩٠ ) ملیار دینار دروست بێت و گرفتی گەورەی دارایی دروست دەكات و دەبێتە هۆی بێ بەشكردنی بەشێكی زۆری مووچەخۆران و دروستكردنی جیاوازی لە نێوان مووچەخۆران.
هەر لەو بارەیەوە، دادگای باڵای فیدراڵیی عێراق لە ڕاگەیەندراوێکدا ئاماژەی بەوەكردووە، پێویستە وەزارەتی دارایی فیدراڵ و وەزارەتی دارایی هەرێم پەلەبکەن لە هەوڵەکانیان بۆ جێگیرکردنی مووچەی فەرمانبەرانی هەرێم.
