وەزارەتی نەوتی عێراق ئاماری هەناردە و داهاتی نەوتی لە مانگی ئایاردا بڵاوکردەوە و داهاتەکەش زیاتر بووە لە یەک ملیار دۆلار.
وەزارەتی نەوتی عێراق لە بارەی كۆی گشتی هەناردەى نەوت و داهاتەكەی لە مانگی ڕابردوو، ڕاگەیاندراوێكی بڵاو كردەوە و تێیدا هاتووە، كۆی گشتی هەناردەى نەوت و داهاتەكەی بۆ مانگی ئایار بەپێی خشتەیەکی دروست لەلایەن کۆمپانیای سۆمۆ دیاریکراوە، كۆی گشتی بڕی هەناردەكراوی نەوتی خاو لەلایەن كۆمپانیای (سۆمۆ)وە، ١٠٤ ملیۆن و ١٣٠ هەزار و ٢٩٢ بەرمیل بووە.
ئاماژە بەوەشكراوە، كۆی گشتی بڕی هەناردەكراوی نەوتی خاو لە كێڵگە نەوتییەكانی ناوەڕاست و باشووری عێراق ٩٦ ملیۆن و ٣٩ هەزار و ٨٥٢ بەرمیل بووە، هاوكات لە كێڵگەكانی كەركوكەوە لە ڕێگەی بەندەری جەیهان، بڕی هەناردەكراوی نەوت سێ ملیۆن و ٥٤٥ هەزار بەرمیل بووە.
وەزارەتی نەوتی عێراق بۆ هەربەرمیل نەوتێک کە فرۆشراوە دەڵێت: نرخی یەك بەرمیل نەوت لە نێوان ٨٠ بۆ ٨٥ دۆلار بووە، و داهاتەكەشی ملیارێك و ٤٢٣ ملیۆن دۆلار بووە.
شایەنی باسە لە ئێستادا نەوتی هەرێم راگیراوە و بە فەرمی ناتوانرێت هەناردە بکرێت، هاوکات کۆمپانیاکانی بەرهەمهێنانی نەوت و وەزارەتی نەوتی عێراق و سامانە سروشتییەکانی هەرێم لە هەوڵەکانیان بەردەوامن بۆ گەیشتنە ڕێککەوتن بۆ دەستپێکردنەوەی هەناردەی نەوتی هەرێم.
