پارێزگاری هه‌ولێر ڕایدەگەیەنێت، به‌بۆنه‌ی جه‌ژنی قوربانی پیرۆزه‌وه پرۆسه‌ی قوربانیكردن ده‌ستیپێكرد، كه ماوه‌ی چوار ڕۆژ به‌رده‌وام ده‌بێت.
پارێزگای هه‌ولێر له ڕاگه‌یه‌نراوێكدا ئاماژەی بەوەكردووە، ئه‌مڕۆ یه‌ك شه‌ممه 16-6-2024، به ئاماده‌بوونی ئومێد خۆشناو، پارێزگاری هه‌ولێر و موسا ئه‌حمه‌د، سه‌رۆكی ده‌زگای خێرخوازیی بارزانی و ئه‌كره‌م ئه‌حمه‌د، یاریده‌ده‌ری پارێزگار و ئارمان تۆپچوو، كونسوڵی گشتیی توركیا له‌هه‌رێمی كوردستان و هاوڕێ ئیحسان، به‌ڕێوه‌به‌ری لقی هه‌ولێری مانگی سووری عێراقی و هه‌ڵمه‌ت هه‌مزه‌سلێمان، به‌ڕێوه‌به‌ری سه‌ربڕخانه‌ی هه‌ولێر، پرۆسه‌ی قوربانیكردن به‌بۆنه‌ی جه‌ژنی قوربانی پیرۆز ده‌ستیپێكرد، كه ماوه‌ی چوار ڕۆژ به‌رده‌وام ده‌بێت.
ڕاشیگەیاندووە، “پڕۆسه‌كه له‌لایه‌ن ده‌زگای خێرخوازی بارزانی و مانگی سووری توركیا و به‌شێك له كه‌سایه‌تییه خێرخوازه‌كان، به‌هاوكاری پارێزگای هه‌ولێر به‌ڕێوه ده‌چێت”.
پارێزگای هه‌ولێر ئاشكراشی كردووە، “گۆشتی خێرخوازیش له كه‌مپی ئاواره‌كان و به‌شێك له گه‌ڕه‌كه هه‌ژارنشینه‌كانی هه‌ولێر دابه‌ش ده‌كرێت”.
