تەندروستیی هەولێر رایگەیاند، تیمێكیان بۆ لەناوبردنی مێروولە لە بندیواری قەڵای هەولێر پێکهێناوە و دەشڵێت: ئەو مێرولەیە هیچ زیانێکی نییە.
بەڕێوەبەرایەتیی گشتیی تەندروستیی هەولێر، لە راگەیەندراوێكدا بڵاویكردووەتەوە:”دوای بڵاوبوونەوەی مێروولەیەکی زۆر لە بندیواری قەڵای هەولێر، دەستبەجێ بەڕێوەبەرایەتیی پاراستنی تەندروستی راسپێردرا بۆ ناردنی تیمی رشاندنی دەرمان بۆ شوێنی مەبەست، بۆ رشاندنی شوێنەکە و نەمانی ئەم زیندەوەرە”.
دەشڵێت: ساڵی رابردوو بەڕێوەبەرایەتیی پاراستنی تەندروستیی هەولێر دوای ناردنی نموونەیەک لەم زیندەوەرە بۆ پشکنین لەبەغداد، دەرکەوتووە هیچ زیانێکی نییە، ئەم مێروولەیە لەسەرەتای دەستپێکردنی وەرزی هاوین پەیدادەبێت و دوای گەرمبوونی کەشوهەوا نامێنێت.
راشیگەیاندووە:”بۆ ئەم مەبەستە هەموو ساڵێک لەپلانی بەڕێوەبەرایەتیی گشتیی تەندروستیی هەولێر، هەڵمەتی رشاندنی دەرمان دژی مێش و مەگەز و زیندەوەرە زیان بەخشەکان ئەنجامدەدرێت، ئەوەش لە رێگەی تیمی رشاندنی تایبەتمەند لە پاراستنی تەندروستیی هەولێر”.
