بەڕێوەبەرایەتی پۆلیسی پارێزگای سلێمانی ڕایدەگەیەنێت، كەسێكیان بە تۆمەتی دزیكردن لە چەند گەڕەكێكی سلێمانی و شاری هەولێر دەستگیر كرد، كە لە هەولێر ١٠٠ مسقاڵ ئاڵتونی دزیوە و لە شاری كەركوك فرۆشتویەتی.
بەڕێوەبەرایەتی پۆلیسی پارێزگای سلێمانی ڕایگەیاند، دوای ئەوەی چەند ھاووڵاتییەك سكاڵایان تۆماركرد كە دزییان لێكراوە، پۆلیس لێكۆڵینەوەو بەدواداچوونەكانیان دەستپێكرد و سەرەنجام توانرا تۆمەتبار بدۆزرێتەوە و دەستگیربكرێت.
ئاماژە بۆ ئەوەشكراوە، كە تۆمەتبارەكە لە گەڕەكەكانی كوردسات، بەختیاری، ئیبراھیم ئەحمەد لە سلێمانی و لە شاری ھەولێر دزی لەماڵان كردووە.
ئەوەشخراوەتەڕوو، لە ئێستادا تۆمەتبار (م ، أ ، ح لەدایكبووی 1999 –دانیشتوی شاری كەركوك ) بەبڕیاری دادوەرو بەپێی ماددەی 443 لەیاسای سزادانی عیراقی ڕاگیراوەو دانی ناوە بەتاوانەكانیدا و وتویەتی كە لەشاری هەولێر بڕی 100 مسقاڵ ئاڵتونی دزیوەو لەشاری كەركوك فرۆشتویەتی
