ئەندامێکی ئەنجوومەنی فەرمانبەران و مامۆستایانی نارازی ڕایدەگەیەنێت، ئایا کام مامۆستا هێندە ساویلکە وخۆشباوەڕە بە بەڵێنێکی تەمومژاوی پڕگومان، کەناکاتە ١٥٪ ی داواکاریەکان، بایکۆت بشکێنێت؟
مامۆستا نەجمەدین، ئەندامی ئەنجوومەنی فەرمانبەران و مامۆستایانی ناڕازی ڕایگەیاند، کاتێک سکاڵامان هەیە لەدادگای فیدڕاڵی بۆچی مەمنونی بڕیاردان یان نەدانی حکومەتی هەرێم ببین؟! کاتێک ئامادەنین وانەبێژان دابمەزرێنن ، بەڵێنی زارەکی بەگرێبەست بوونیان چی لە هاوکێشەکە دەگۆڕێ؟!
ئەو مامۆستایە دەپرسێت، ئایا کام مامۆستا هێندە ساویلکە وخۆشباوەڕە بە بەڵێنێکی تەمومژاوی پڕگومان، کەناکاتە ١٥٪ ی داواکاریەکان، بایکۆت بشکێنێت؟ ئایا ئەتانەوێ ساڵێکی تر هەمان تاس وحەمام و بایکۆت دووبارە و دەبارە بکەنەوە؟
جەختیشی کردۆتەوە، دروشمی (بایکۆتمان کردووە تا بایکۆت نەکەینەوە) و دەشڵێت: “ئەبێت کێ ژێر بەژێر و بەدزییەوە بەڵێنی شکاندنی بایکۆتی دابێت؟! کێ دەیەوێ خەباتی مامۆستایان هەرزان فرۆش بکات؟”.
مامۆستا نەجمەدین ئاماژەی بەوەداوە، کە ئێمە ئەمساڵ بە جوڵە دبلۆماسی و چڕوپڕەکانمان ئومێدمان گەڕاندەوە بۆ شەقامی مامۆستایان، ناکرێت هەندێک زۆر بێباکانە جارێکی تر شکۆی مامۆستا بشکێننەوە و لەبچووکی خۆیانەوە بڕواننە گەورەیی و شکۆمەندی مامۆستایان.
