نرخی زێڕ بۆ كەمترین ئاست لەماوەی ئەمساڵدا دابەزیوە و هۆكارەكەشی دەگەڕێتەوە بۆ زیادبوونی سوو، هەروەها زیادبوونی ئاستی دامەزراندن لە ئەمریكا و زێڕنگەرێك دەڵێت: نرخەكەی زیاتر دادەبەزێت.
دانا وەرتی، خاوەنی زێڕنگەری ئازوورا لە هەولێر بۆ (خەڵك) ڕایگەیاند، لە ئێستادا بەپێی ستراتیجی خۆم زێڕ نیشانەی بەرزبوونی نەداوە بۆ درێژمەودا و ڕێتێست و جووڵەی مەودا کورت هەیە.
وتیشی، “ئێستا نرخی یەك ئۆنسە 1906 دۆلارە و نیشانەی زاڵ تا ئەم خولەکە دەبێت بۆ خوار 1900 دۆلار دابەزێت.
ئاماژەی بەوەشكرد، نرخی یەك مسقاڵ زێڕی عەیار 24 بە 461 هەزار دینارە و عەیاری 21 بە 407 هەزار دینارە و عەیاری 18 بە 347 هەزار دینارە.
ئەو زێڕنگەرە هۆكاری دابزینی بەهای زێڕ دەگێڕێتەوە بۆ دوو هۆكار، كە بریتین لەوەی “ئەندامانی لیژنەی فیدڕاڵی کۆکن لەسەر بەرزکردنەوەی سووی زیاتر بەپێی داتاکان و هەروەها تێکڕایی گۆڕانی دامەزراندن لە کەرتی تایبەت جگە لە کەرتی کشتوکاڵ لە ئەمریکا پێشتر 278 هەزار بووە و ئێستا زیادبووە بۆ 497 هەزار”.
