پۆلیسی گەرمیان ئەو كەسانە دەستگیر دەكات، كە منداڵێكی تازە لەدایكبوویان لەناو كارتۆنێكدا لە كەلار فڕێ دابوو.
بەڕێوەبەرایەتی پۆلیسی گەرمیان لە ڕاگەیەنراوێكدا ئاماژەی بەوەكردووە، دوای ئەوەی لەبەرواری 24/4/2023 لەنزیک مزگەوتی تەقوای قەزای کەلار منداڵێکی تازە لەدایکبوو لەڕەگەزی نێر لەنێو کارتۆنێک دۆزرایەوە ، دەست بەجێ پۆلیس بەفەرمانی بەڕێوەبەری پۆلیسی گەرمیان بەشی پۆلیسی کەلار و مەفرەزەکانی 104ی کەلار دەستیان بەلێکۆڵینەوە کرد.
ئاشكراشی كردووە، بەسوود بینین لەکامێرای چاودێری توانیان تۆمەتباران، کە لە سێ تۆمەتبار پێک هاتوون، دەستگیربکەن .
ئاماژەی بەوەشكردووە، دای لێکۆڵینەوە لەگەڵ دایکی منداڵەکه، کەلەدایکبووی 1988 دانیشتووی قەزای کەلارە دانی بەوەدا نا، کە منداڵی ئەوە و دوای لەدایکبوونی بەهاوکاری دوو تۆمەتباری تر، کە پیاوێک و ئافرەتێکن و خزمی باوکی منداڵەکەن منداڵەکەیان لەنزیک مزگەوتی ناوبراو بەجێ هێشتووە.
ڕاشیگەیاندووە، لەئێستادا تۆمەتباران بەپێی مادەی 383 بەندکراون و لێکۆڵینەوە لەگەڵیان بەردەوامە و دادوەر فەرمانی دەستگیرکردنی بۆ تۆمەتبارێکی تر دەرکردوە.
