وەزیری ئاوەدانکردنەوە و نیشتەجێکردنی حکومەتی هەرێمی کوردستان رایگەیاند، لە کابینەی نۆیەمدا نەیانهێشتووە جیاوازی و دابەشکاری هەبێت، لە نێوان پارێزگاو ناوچەكان بۆ خزمەتگوزاری و رێگاوبان، دەشڵێت:” رێککەوتنی نێوان هەرێم و بەغدا یەکێکە لە رێککەوتنە باشەکان”.
دانا عەبدولكەریم، وەزیری ئاوەدانكردنەوە و نیشتەجێکردن بە میدیای فەرمی حزبەکەی راگەیاندووە، ئەو رێککەوتنەى لەنێوان حکومەتى هەرێم و بەغدا کراوە یەکێکە لە رێککەوتنە باشەکان و لەگەڵ پەسەند کردنى بودجەى عێراق کاریگەرى باشى دەبێت لەسەر گەشانەوەى ئابورى هەرێمى کوردستان و سەقامگیرى ئابورى ژیانى هاووڵاتییان و موچەخۆران.
دەشڵێت:” لەم کابینەیەدا نەیانهێشتوە جیاوازى و دابەشکارى هەبێت، بەڵام جیاوازى هەیە لە چۆنیەتى خەرجکردنى سیولە و سلفەى پارەى بەڵێندەرى جێبەجێکارى پڕۆژەکان لە پارێزگایەک بۆ پارێزگایەکى دیکە، ئەوەش وایکردوە لە هەندێک شوێن کارەکان باشتر بەڕێوەبچن”.
وەزیری ئاوەدانکردنەوە و نیشتەجێکردنی حکومەتی هەرێم ئاماژەی بەوەشکردووە. ئەگەر بوجە لەبەردەست بێت هەموو هەوڵێکیان تەواوکردنى رێگا دووسایدەکانە و نمونەى ئەوە دێنێتەوە کە تا دەستبەکاربونى ئەوان کەمتر لە ١٥%ى رێگاى نێوان سلێمانى ئەنجامدرابوو، ئیستا گەیشتوەتە ٦٠% و زیاتر لە ٧٠ ملیار دیناریان بۆ خەرجکردوە، “بەڵام هێشتا پێویستى بە ٦٥ ملیار دینارى دیکە هەیە بۆئەوەى پڕۆژەکە تەواوببێت”.
سەبارەت بە دەستپێکردنەوەی هەناردەی نەوتی هەرێم وتیشی: بڕیار بوو ئەم هەفتەیە دەستپێبکاتەوە و داهاتی نەوتیش لە دوای رێککەوتنەکە دەچێتە سەر هەژمارێکی بانکی و دەسەڵاتی خەرجکردنی پارەکەشی لای سەرۆکی حکومەتی هەرێم یان ئەو کەسە دەبێت کە سەرۆکی حکومەت دیاریدەکات.
راشیگەیاند، بە پەسەندکردنی بودجەی عێراق هیچ دڵەراوکێیەک لە دابەشکردنی مووچەی فەرمانبەران نامێنێت و دوای پەسەندکردن و باش بوونی دۆخەکە پلە بەرزکردنەوەی فەرمانبەرانیش دەستپێدەکاتەوە. و زیاتر لە ١٠٠ پرۆژەش بەهۆی نەبوونی بودجەوە وەستاوە.
