پۆلیسی سلێمانی رایگەیاند، به‌تۆمه‌تی ته‌شهیرو ناوزڕاندنی هاووڵاتییان لەتۆڕەکۆمەڵایەتییەکان، مه‌فره‌زه‌كانی بنكه‌ی پۆلیسی سه‌یدسادقی سه‌ر به‌به‌شی پۆلیسی سه‌یدسادق سێ تۆمه‌تباریان ده‌ستگیركرد.
بەڕێوەبەرایەتی پۆلیسی سلێمانی لە راگەیەندراوێکدا بڵاویکردووەتەوە، دوای ئه‌وه‌ی چه‌ند هاووڵاتییه‌ك سكاڵای یاساییان تۆماركرد كه له‌تۆڕه‌كۆمه‌ڵایه‌تییه‌كان ته‌شهیرو سوكایه‌تییان پێ ده‌كرێت‌و ناویان ده‌زڕێنرێت، ده‌ستبه‌جێ هێزەكانی پۆلیس لێكۆڵینەوەو بەدواداچوونەكانیان بۆ دۆزینه‌وه‌و ده‌ستگیركردنی تۆمه‌تباران دەستپێكرد.
پۆلیس دەشڵێت:”دوای وەرگرتنی بڕیاری دادوه‌ر، مەفرەزەکانیان توانیان تۆمه‌تباران بدۆزنه‌وه‌و ده‌ستگیریان بكه‌ن، تۆمه‌تباران (ئـ، ئـ ع – هـ، هـ، ش – ش، س، ع) دانیان به‌تاوانه‌كه‌یاندا ناوه‌و لەئێستادا بەبڕیاری دادوەرو بەپێی ماددەی ٢ی خراپ بەکارھێنانی ئامێرەکانی پەیوەندیکردن ڕاگیراون‌و لێكۆڵینەوەكان لەگەڵیاندا بەردەوامە”.
