جوتیار عادل وتەبێژی حكومەتی هەرێمی كوردستان ئاماژە بە درێژەدان بە گفتووگۆكان دەكات لەگەڵ حكومەتی فیدراڵ و دەڵێت، بەردەوامبوەونی گفتووگۆكان لەگەڵ بەغدا لەپێناو بەژەوەندی خەڵك و بۆ دابینكردنی مووچەیە بۆ فەرمانبەران.
ئەمڕۆ پێنج شەممە، جوتیار عادل وتەبێژی حكومەتی هەرێمی كوردستان ڕایگەیاند:”گفتووگۆكان لەگەڵ حكومەتی فیدراڵ بەردەوامن و یەكێك لە هۆكارەكانی درێژەدان بەو گفتوویانەش، لەپێناو بەرژەوەندی خەڵكدایە كە بۆ مەبەستی دابینكردنی مووچە بۆ فەرمانبەران و بەدەستهێنانی شایستە داراییەكانی هەرێمی كوردستانە”، ئاماژەی بە سەردانی شاندێكی حكومەتی هەرێمیش كرد لە ماوەكانی داهاتوودا بۆ بەغدا.
بە وتەی جوتیار عادل:”جگە لە بابەتی مووچە و شایستە داراییەكان كە وابەستەی بودجەن، لەسەر كۆمەڵێك دەقی یاسایی لەگەڵ حكومەتی فیدراڵ لێكتێگەیشتن كراوە، هەندێك پرسی تری وەك ماددەی 140ی دەستور و چەند یاسایەكی تر، جەخت لەسەر یەكلایی كردنەوە و چارەسەكردنییان كراوە”.
وتەبێژی حكومەتی هەرێمی كوردستان دەڵێت:”دادگای فیدراڵ بەپێی یاسایەك كە لەلایەن پۆڵ برێمەرەوە دەركراوە دامەزراوە، ئەمەش پێچەوانەی دەستورە، بۆیە دەبێت ئێمە پشت بە دەستور ببەستین بۆ پێكهێنانی ئەو جۆرە دادگایە لەڕووی پێكهاتە و دەسەڵاتەكانی”، بڕیارەكانی ئەم دواییەی دادگای فیدراڵی عیراقیشی بە ناقەبوڵكراو لەلایەن حكومەتی هەرێمەوە لەقەڵەمدا و بەپێویستی زانی دادگاكە بێلایەن و دوور لە ململانێی سیاسی بێت.
