پارتی دەسەڵاتداری تورکیا لە پەرلەمانی ئەو وڵاتە ڕەشنووسی یاسایەکی بۆ کۆکردنەوەی ملیۆنان سەگی بێ لانە لە شەقامەکانی ئەو وڵاتە خستووەتەڕوو تا ملیۆنان سەگ، لە جێیەکدا کۆبکەنەوە.
پارتی داد و گەشەپێدانی دەسەڵاتداری تورکیا، پڕۆژەیاسایەکی پێشکەش بە پەرلەمان کردووە کە ئامانج لێی کۆکردنەوەی ملیۆنان سەگی بێ لانەیە، لە شەقامەکان، کە بەپێی پرۆژە یاساکە سەگە بێ لانەکان لە جێیەکی تایبەتدا داڵدە دەدەن و ئەم کارەش، ئاژەڵدۆستانی نیگەران کردووە کە دەڵێن هەڵمەتی تەعقیمکردنی بەکۆمەڵ چارەسەرێکی باشترە تا لە زیندانیکردنی سەگەکان لە شوێنی داڵدەدانیاندا.
بەپێی پڕۆژە پێشنیارکراوەکە، شارەوانییەکان ئەرکی کۆکردنەوەی سەگی بێ لانە لە شەقامەکان و گواستنەوەیان بۆ شوێنی داڵدەدان و پێشکەشکردنی بە هەرکەسێک کە بیەوێت ببێتە خاوەن پێدەسپێردرێت، سەگی توند و تیژ یان ئەوانەی بەدەست نەخۆشییەکەوە دەناڵێنن کە چارەسەریان نییە دەکوژرێن.
عەبدوڵڵا گولەر، پەرلەمانتاری پارتی داد و گەشەپێدان بە ڕۆژنامەنووسانی ڕاگەیاند، “شەقام شوێنێک نییە سەگ تێیدا بژی، بەڵام مافی ئەوەیان هەیە لە شوێنی حەوانەوەی گونجاوتردا بژین”.
بەگوێرەی ڕەشنووسی یاساکە، ژمارەی سەگی بێ لانە لە تورکیا بە 4 ملیۆن سەگ مەزەندە دەکرێن.
شارەوانییەکان لە شارە جۆربەجۆرەکانی تورکیا لە ماوەی بیست ساڵی ڕابردوودا دوو ملیۆن و 500 هەزار سەگیان تەعقیمکردووە، کە یاسای ئێستا داوا لە نشارەوانییەکان دەکات هەموو سەگەکانی سەر شەقام تەعقیم بکەن و کوتانیان بۆ ئەنجام بدەن و دواتر بەجێیان بهێڵن، بەڵام بەپێی دەرخستەی پرۆژە یاسا تازەکە، سەگەکان بەشێکیان دەبێت لەناو ببرێن.
سەرچاوە: ڕۆیتەرز
