سەرۆکی یەکێتیی نیشتمانیی کوردستان ڕەتیکردەوە هیچ پێشنیازێک بۆ دواخستنی هەڵبژاردنی پەرلەمانی کوردستان کرابێت و وتی: “لە کاتی خۆیدا دەکرێت”.
ئەمڕۆ یەکشەممە، بافڵ تاڵەبانی سەرۆکی یەکێتی لە بەغداوە ئەو دەنگۆیانەی ڕەتکردەوە کە سەبارەت بە دواخستنی هەڵبژاردنی پەرلەمانی کوردستان ڕایگەیاند، هەڵبژاردن لە کاتی خۆیدا دەکرێت و هیچ پێشنیازێک بۆ دواخستنی نەکراوە.
پێشتریش ڕزگار حاجی حەمە، لێپرسراوی دەزگای هەڵبژاردنی یەکێتی لە لێدوانێکیدا بۆ “خەڵک” ڕایگەیاند، لە کۆبوونەوەکەی هاوپەیمانی ئیدارەی دەوڵەتدا باسی دواخستنی هەڵبژاردنی پەرلەمانی کوردستان نەکراوە.
ئەمەش لە کاتیكدایە کە ئەمڕۆ دەنگۆی ئەوە بڵاوکرایەوە کە لە کۆبوونەوەکەی دوێنێ شەوی هاوپەیمانی ئیدارەی دەوڵەتدا کە لە بەغدا بەڕێوەچوو، یەکێتی بە داواکارییەکی پارتی بۆ دواخستنی هەڵبژاردن ڕازی بووە.
