بڕیار بوو خۆپیشاندانی مامۆستایانی ناڕازی بەڕێوەبچێت، بەڵام لەلایەن هێزە ئەمنییەکانەوە ڕێگرییان لێکرا و ژمارەیەک مامۆستاش دەستگیرکران.
پاش ڕاگەیاندنی ئەنجومەنی مامۆستایانی ناڕازی بۆ ئەنجامدانی خۆپیشاندان لە بازنەی مەلیک مەحموودی شاری سلێمانی و بەرەو دەباشان، ئەمڕۆ دووشەممە، مامۆستایان گردبوونەوە بۆ خۆپیشاندان و ناڕەزایەتی، بەڵام لەلایەن هێزە ئەمنییەکانەوە ڕێگرییان لێکرا و ژمارەیەک لە نوێنەری مامۆستایانی ناڕازیش دەستگیرکران.
بەپێی زانیارییەکانی کە دەست (خەڵک) کەوتووە، لە هەڵەبجە، كەلار و سلێمانی ژمارەیەك مامۆستای ناڕازی دەستگیرکراون و ڕیگریش لەوەکراوە مامۆستایان خۆپیشاندانەکانیان بەرەو دەباشان بەرن، لەلایەن هێزە ئەمنییەکانەوە لە سلێمانی: مامۆستا نەجمەدین محەمەد، سادق هەڵەدنی، عادل حەسەن و مامۆستا عەبدولخالق ماوەتی دەستگیرکراون.
هاوکات لە گەرمیان، مامۆستا نەبەرد ئەحمەد، ئاری عزەدین و ئاسۆ محەمەد، لە هەڵەبجەش مامۆستا دانا عەبدول و هاوڕێكانی دەستگیرکران.
عوسمان کاروانی، کارگێڕی ئەنجومەنی جێبەجێکردنی یەکگرتوو لەو بارەیەوە ڕایگەیاند، مامۆستایان دەستگیر مەکەن داواکاریەکانیان جێبەجێبکەن، چونکە داواکاری ئەوان داواکاری سەرجەم خەڵکی کوردستانە.
خۆپیشاندان و ناڕەزایەتی مامۆستایان لە کاتێکدایە، کە چەند ڕۆژێک دەبێت لە بەڕێوەبەرایەتی و فەرمانگەکانی پارێزگای سلێمانی لە دژی دواکەوتنی مووچە و قەیرانە داراییەکان بایکۆتی دەوامیان ڕاگەیاندووە، داوا دەکەن بە زووترین کات مووچە دابەشبکرێت.
