بڕیارە ئەمڕۆ یەکشەممە، خۆپیشاندانی مامۆستایانی ناڕازی دژی جێبەجێنەکردنی داواکارییەکانیان دەستپێبکاتەوە.
خۆپیشاندانەکە شار و شارۆچکەکانی سلێمانی، هەڵەبجە، گەرمیان و ڕاپەڕین هەروەها کۆیەی سەر بە پارێزگای هەولێر دەگرێتەوە.
جیاواز لە خۆپیشاندانەکانی ڕابردوو، مامۆستایانی ناڕازی لە هەولێریش ڕاگەیەندراوێکیان بڵاوکردەوە و تێیدا باسیان لەوە کردووە کە ئەمڕۆ بەشداری ناڕەزایەتییەکان دەکەن.
خۆپیشاندانەکە لە کاتێکدایە کە بەڕێوەبەرایەتییەکانی پەروەردە جەخت لە دەستپێکردنەوەی دەوام و سزادانی ئەو مامۆستایانە دەکەنەوە کە پابەندی دەوام نابن.
دوێنێش ژمارەیەك لە کەسایەتییەکانی سلێمانی و هەڵەبجە، لە کۆنگرەیەکی ڕۆژنامەوانی هاوبەشدا داوایان لە مامۆستایان کرد کۆتایی بە بایکۆت بهێنن و بگەڕێنەوە بۆ هۆڵەکانی خوێندن.
مامۆستایان داوای چارەسەرکردنی کێشەی مووچە، دەستپێکردنەوەی پلەبەرزکردنەوە و دامەزراندنی مامۆستایانی وانەبێژ دەکەن، بەڵام تا ئێستا حکومەتی هەرێمی کوردستان هیچ داواکارییەکیانی جێبەجێ نەکردووە.
