ڕۆژی هەڵبژاردنی سەرۆکی پەرلەمانی عێراق دیاری کرا کە بە هۆی ناکۆکی نێو سوننەکانەوە چەندجارێك دواخرا.
ئەمڕۆ پێنجشەممە، فەرمانگەی ڕاگەیاندنی ئەنجومەنی نوێنەرانی عێراق بڵاویکردەوە، ڕۆژی شەممەی داهاتوو دانیشتنی تایبەت بە هەڵبژاردنی سەرۆکی ئەنجومەنەکە بەڕێوەدەچێت.
ڕوونیشیکردەوە کە دانیشتنەکە کاتژمێر 3ی پاشنیوەڕۆ ئەنجام دەدرێت.
ڕۆژی 14ی تشرینی دووەمی ڕابردوو، دادگای باڵای فیدڕاڵی عێراق ئەندامێتی محەمەد حەلبوسی لە ئەنجومەنی نوێنەران هەڵوەشاندەوە و بەوەش پۆستی سەرۆکی ئەنجومەنەکە بە بەتاڵی مایەوە.
