ئۆتۆمبێلێكی سەنی بەهۆی ڕووداوی هاتووچۆوە لەگەڵ بارهەڵگرێك، كەوتە ناو ڕووبارێكەوە لە سەر ڕێگای سۆران و دوو ژن، كە خوشكی یەكترن بریندار بوون.
بەڕێوەبەرایەتی بەرگری شارستانی سۆران بڵاویكردەوە، ئەمڕۆ ڕێکەوتی ٢٠٢٥/١/١٣ لە کاتژمێر (٤:٢٧)ی ئێوارە ئاگادارکراینەوە کە لەئەنجامی ڕووداوێکی هاتووچۆ ئۆتۆمبێلێک کەوتۆتە نێو ڕووبار لەسەر ڕێگای سۆران/چۆمان لە نزیک پڕدی حافیز.
ڕاشیگەیاند، دەستبەجێ تیمەکانی ڕزگارکردن و بنکەی خانەقا و بنکەی سۆران دەرچون بۆ شوێنی ڕووداوەکە و دەرکەوت ئۆتۆمبێلەکە لەجۆری نیسان (سەنی) دوو سەرنشینی تیادابووە، كە هەردووکیان ئافرەت بوون و خوشکی یەکتر، بریندار بوون.
ئاماژەی بەوەشكرد، هەردوو سەرنشینەكە گواسترانەوە بۆ نەخۆشخانە و لەئێستادا تیمەکانمان سەرقاڵی هێنانەدەرەوەی ئۆتۆمبێلەکەن لەنێو ڕووباردا.
ئاشكراشی كردووە، ڕووداوەکە لەنێوان ئۆتۆمبێلی نیسان (سەنی) و بارهەڵگرێک ڕوویداوە.
