نزیکەی 500 پارچە زەویی لە سلێمانی بەسەر زیندانیانی سیاسیدا دابەشکرا.
سەرۆکایەتیی شارەوانی سلێمانی لە ڕاگەیەندراوێکدا بڵاویکردەوە، ئەمرۆ لە ڕێوڕەسمێکی بێخەوشدا لە هۆلی ڕۆشنبیری سلێمانیی 492 پارچە زەویی لە سێکتەرەکانی ” فەرمانبەران، لاوان، سۆتکە ”، بەشێوەی تیروپشک بەسەر زیندانیانی سیاسیدا دابەشکرا.
پرۆسەکە بە ئامادەبوونی لیلی عمر علی، سەرۆکی شارەوانیی سلێمانی و بەڕێوەبەری دەزگای شەهیدان و سەرۆکی کۆمکاری زیندانیانی سیاسیی کوردستان و نوێنەری وەزارەتی شارەوانیی و گەشتوگوزار و نوێنەری بەڕێوەبەرایەتی کاروباری زیندانییە سیاسییەکان بەڕێوەچوو.
ئەمە لە کاتێکدایە، دوای بڕیارێکی مەسرور بارزانی سەرۆک وەزیرانی هەرێم، بڕیار درا بە جێبەجێ کردنی فەرمانی تەرخان کردنی زەوی بۆ کەسوکاری شەھیدان و ئەنفالکراوان و جینۆساید و زیندانیانی سیاسی و رزگاربووانی شاڵاوی ئەنفال لە سنووری پارێزگا و ئیدارە سەربەخۆکان لە ھەرێمی کوردستان.
هاوکات لەماوەی دوو ساڵی ڕابردوودا تا ئێستا زیندانیانى سیاسی و کەسوکاری شەھیدان لەئیدارەی سەربەخۆی ڕاپەڕین‌و گەرمیان زەویان وەرگرتووە.
هەرچەندە بڕیاری دابەشکردنی زەوی مامۆستایان و فەرمانبەرانیشی گرتۆتەوە، بەڵام تا ئەم ساتە هیچ زەوییەک بەسەر مامۆستایاندا دابەشنەکراوە و شارەوانیش چەند جاریک کۆبوونەوەی لەبارەی خێراکردنی پرۆسەی دابەشکردنی زەوی بەسەر فەرمانبەران ئەنجامداوە.
