دوابەدوای مەڕاسیمی ڕادەستی كردنی پۆستی ڕێكخەری بزووتنەوەی گۆڕان لە لایەن عومەری سەید عەلی بە دانای ئەحمەد مەجید بە وەكالەت تا ماوەی 6 مانگ و هەڵبژاردنی ڕێكخەری نوێ، وتەبێژی بزووتنەوەكە ڕایگەیاند، قۆناغی داهاتوو بەرەو ئۆپۆزسیۆنبوون هەنگاو دەنێین و نوێنەرایەتی شەقام و دەنگی ناڕازی خەڵك دەكەینەوە .
دلێر عەبدولخالق، وتەبێژی بزووتنەوەی گۆڕان لە كۆنفڕانسێكی ڕۆژنامەوانیدا، كە پەیامنێری (خەڵك) ئامادەی بوو، ڕایگەیاند، داخستنی دەرگای گردەكە لەسەر هەڵسوڕاوان و هاوڕێكانی كاك نەوشیروان، بڕیارێكی هەڵەیە، بەڵام ئێمە ئەم مەڕاسیمەمان لەم پاركە گشتییە كرد، كە موڵكی هەموو خەڵكە و گردی گۆڕانیش موڵكی هیچ كەسێك نییە، بەڵكو موڵكی هەموو گۆڕانخوازانە و شوێنێكە بۆ پانتایی گشتیی و نە ئەمڕۆ و نە هیچكات نابێ بە موڵكی تایبەتی هیچ كەسێك .
ڕاشیگەیاند، قۆناغی داهاتوو بەرەو ئۆپۆزسیۆنبوون هەنگاو دەنێین و نوێنەرایەتی شەقام و دەنگی ناڕازی خەڵك دەكەینەوە و هیوادارین خەڵك دەرفەتێكی دیكە بە بزوتنەوەی گۆڕان بداتەوە .
وتیشی، “داوای لێبوردن دەكەین كە ئەگەر لە قۆناغێكدا خەڵكمان بێ ئومێد كردبێت و هەڵەیەكی سیاسییمان كردبێت، هەوڵدەدەین ماڵ لەگەڵ دەسەڵات لەت بكەین و ماڵ لەگەڵ خەڵك پێكبهێنینەوە”.
ئاماژەی بەوەشكرد، دەمانەوێت كێشەكانی هەرێم لەگەڵ بەغدا چارەسەر بكرێت و چیتر بابەتی ژیان و گوزەران و مووچەی خەڵك نەبێتە موزایەدەی سیاسیی.
جەختیشی كردەوە، داوا لە خەڵك و هەڵسوڕاوان دەكەین، كە لەبەر هەر هۆكارێك دەنگیان پێنەداوین، ئێستا بزوتنەوەی گۆڕان بە بەرنامە و پلانێكی نوێ و تۆكمەوە دێینەوە مەیدان و متمانەمان پێكەن و دەنگمان پێبدەنەوە .
