“نرخی گۆڕستانە تازەکەی سلێمانی هەرزانترە”

شارەوانی سلێمانی داوا لە هاووڵاتیان دەکات گۆڕستانە نوێیەکە بەکار بهێنن و نرخی گۆڕستانە تازەكە هەرزانترە.

شارەوانی سلێمانی لە تۆمارێكی ڤیدیۆییدا ڕایگەیاند، گۆڕستانی نوێی سلێمانی نزیكەی 200 دۆنمە و بەشێوەی ڕیزبەندی گۆڕی تێدا هەڵدەكەندرێت و دووری نێوان گۆڕەكان یەك مەتر دانراوە و ڕێگای هاتووچۆ تیایدا ئاسانە.

ڕاشیگەیاند، داوا لە هاووڵاتیان دەكەین مردووەكانیان لێرە بەخاك بسپێرن، چونکە گۆڕستانەكانی دیکە، كە نزیكەی 25 گۆڕستانن جێگەی مردوو ناشتنیان تێدا نەماوە و ئەم گۆڕستانە نرخەکەی هەرزانترە لە گۆڕستانەکانی دیکە.

ئاماژەی بەوەشكرد، ئەم گۆڕستانە 24 كاتژمێر كراوەیە و پاسەوانی لێیە و هاوكاری هاووڵاتیان دەكرێت لە بەخاكسپاردنی مردووەكانیان.