ئەنجومەنی پارێزگەی كەركووک كۆدەبێتەوە، بەڵام پارتی و توركمانەکان و بەشێکی عەرەبەکان بەشداری تێدا ناکەن.
بڕیارە ئەمڕۆ شەممە، ئەنجومەنی پارێزگەی کەرکووک لەسەر داوای محەمەد حافز، سەرۆكی ئەنجومەنەکە کۆبێتەوە، کە لە دوای هەڵبژاردنی پارێزگارەوە بە یەکەم کۆبوونەوە دادەنرێت.
تا ئێستا پارتی و تورکمانەکان و بەشێکی عەرەبەکان ئامادە نین دان بە ئەنجامەکانی کۆبوونەوەکەی 10ی ئەم مانگەی ئەنجومەنی پارێزگەی کەرکووکدا بنێن کە لە بەغدا بەڕێوەچوو و تێیدا ڕێبوار تەها وەک پارێزگار و محەمەد حافز لە پێکهاتەی عەرەب وەک سەرۆکی ئەنجومەنەکە هەڵبژێردران.
لە کۆبوونەوەکەدا پۆستەکانی تورکمانەکان بە بەتاڵی هێڵرانەوە تا ئەو کاتەی بڕیار لەسەر بەشداریکردن لە حکومەتی خۆجێیی پارێزگاری کەرکووکدا دەدەن.
پارتی و تورکمانەکان و نیوەی عەرەبەکان چاوەڕوانی ئەنجامی ئەو سکاڵایە دەکەن کە لە دژی کۆبوونەوەکەی بەغدا تۆمارکراوە و هەفتەی ڕابردووش دادگەی کارگێڕی دوو سکاڵای ڕاکان جبوری و حەسەن تۆرانی ڕەتکردەوە کە تێیدا داوای ڕاگرتنی کارکردن بە ئەنجامی کۆبوونەوەکەی بەغدایان کردبوو تا ئەو کاتەی بڕیار لەسەر سکاڵاکەیان دەدرێت.
