ژووری بازرگانی کەرکووک لە نوسراوە فەرمییەکاندا ناحیەی قەرەھەنجیر بە ڕەبیع ناودەبات، کە پێچەوانەی بڕیارێکی ئەنجومەنی پارێزگایە.
سەباحەدین ساڵح، بەڕێوەبەری ژووری بازرگانی کەرکووک لە نوسراوێکدا کە بۆ یەکێتی پیشەسازانی عێراقی ناردووە، ناوی ناحیەی قەرەھەنجیر بە ڕەبیع ناودەبات کە لەسەردەمی ڕژێمی بەعس و لەچوارچێوەی سیاسەتی تەعریبدا ئەو ناوەی بەسەردا سەپێندرابوو.
بەکارھێنانی ناوی رەبیع بۆ ناحیەی قەرەھەنجیر، پێچەوانەی یاسا و بڕیارێکی ئەنجومەنی پارێزگای کەرکووکە، کە پێشتر بە بڕیارێک ئەو ناوەی ھەڵوەشاندبووەوە.
ئەنجومەنی پارێزگەی کەرکووک لە ١٦ی ئاداری ٢٠١٣ لە دانیشتنێکدا بڕیاریدا بە ھەڵوەشاندنەوەی ناوی رەبیع، کە رژێمی بەعس بەسەر ناحیەکەدا سەپاندبووی و ناوەکەی پێشووی بۆی گەڕاندەوە کە قەرەھەنجیرە.
