بە لەبەرچاوگرتنی ڕووداوی ئاگرکەوتنەوەکەی ساڵی ڕابردوو، تیمەکانی بەرگری شارستانی مەرجەکانی سەلامەتی لە بینا و باڵەخانەکانی بەشە ناوخۆییەکانی قوتابیان و مامۆستایانی زانکۆی سۆران دابیندەکەن.
ئەمڕۆ یەکشەممە، بەڕێوەبەرایەتی بەرگری شارستانی سۆران ڕایگەیاند، بینا و باڵەخانەکانی بەشە ناوخۆییەکانی قوتابیان و مامۆستایانی زانکۆی سۆران بۆ ساڵی نوێی خوێندن ئامادە دەکرێت، بەمەبەستی دابینکردنی گشت مەرجەکانی سەلامەتی بۆ پاراستنی گیانی قوتابیان و مامۆستایان لە کاتی بوونی هەر ڕووداوێکی نەخوازراو.
ئاماژەی بەوەشکرد، جەخت دەکەینەوە لەسەر هەبوونی گشت مەرجەکانی سەلامەتی بەشێوەیەک کە بتوانرێ بە ئاسانی کۆنتڕۆلی ڕووداوەکان بکرێت و قوتابیان بە سەلامەتی ڕزگاربکرێن.
ئەمەش لە کاتێکدایە، شەوی 8ی کانوونی یەکەمی 2023 لە ئەنجامی ئاگرکەوتنەوە لە باڵەخانەیەک لە سۆران کە ژمارەیەک قوتابی، مامۆستا و هاووڵاتی ئاسایی تێیدا نیشتەجێبوون، 14 کەس گیانیان لەدەستدا و حەوت کەسێکی دیکەش برینداربوون.
