لیژنەیەک لە بەڕێوەبەرایەتی خۆپاراستنی تەندروستی سلێمانی بۆ بەدواداچوون و کۆنترۆڵکردنی پەتای سکچوون پێکهێنرا، هاوکات فرۆشتنی ئەو سەوزانە قەدەغە کرا کە بە ئاوی قورس ئاودەدرێن.
ئەمڕۆ چوارشەممە، بەڕێوەبەرایەتی خۆپاراستنی تەندروستی سلێمانی لە ڕاگەیەندراوێکدا بڵاویکردەوە، لیژنەیەک بۆ بەدواداچوون و كۆنترۆڵكردنی پەتای سكچوون لەسەر ئاستی (بەڕێوەبەرایەتی خۆپاراستنی تەندروستی سلێمانی) بە (لێپرسراوێتی بەڕێوەبەری خۆپاراستن)، (ئەندامێتی بەڕێوەبەری كارگێڕی)، (لێپرسراوانی هۆبە پەیوەندیدارەكان) پێکهێنرا.
ئاماژەی بەوەکرد، کاری لیژنەکە بڵاوكردنەوەی پەیامی هوشیاری و خۆپارێزی لە نەخۆشی سكچوون دەبێت، لەگەڵ زیادكردنی وەرگرتنی نمونەی ئاو بەتایبەتی لە ئاوی شەمعەكان و تەنكی سەرەكی ئاوی پرۆژەكان و ئاوی ماڵان و پشكنینیان، جەخت كردنەوە لەسەر قەدەغەكردنی فرۆشتنی ئەو سەوزانەی بە ئاوی قورس (ئاوەڕۆ) ئاودەدرێن.
ئەوەشی خستەڕوو، چاودێری تەندروستی لە ڕێستۆرانت و شوێنە گشتیەكاندا توند دەکرێتەوە، جەخت لە فرۆشیارانی شەربەت و ساردەمەنی دەکرێتەوە بۆ بەكارهێنانی ئاوی پاك و وەرگرتنی نمونەی زیاتر بۆ پشكنین.
ڕاشیگەیاند، جەخت دەکرێتەوە لەسەر پشكنینی نموونەی وەرگیراو لە نەخۆشانی توشبوو بە سكچوون.
