سوید بڕیاریدا بە چەند قۆناغێک سەرجەم هاوکارییە داراییەکانی بۆ عێراق ڕابگرێت و دەڵێت” عێراق ئێستا بووەتە وڵاتێكی داهات مامناوەند و ئیتر دەتوانێت لەسەر پێی خۆی بووەستێت”.
بەپێی سەرچاوەکانی هەواڵ کە میدیا عێراقییەکان بڵاویان کردۆتەوە، حكوومەتی سوید رێنمایی داوەتە ئاژانسی هاوكاری نێودەڵەتی بۆ گەشەپێدانی سوید (سیدا) و ئەكادیمیای فۆڵك بێرنادۆت، بە چەند قۆناغێک هاوكارییەكانیان بۆ عێراق رابگرن.
بەپێی ڕێنماییەکان حکومەتی سوید بە نیازە تا 30 حوزەیرانی 2025 سەرجەم هاوکارییە داراییەکان بوەستێنێت و یوهان فۆرسێل وەزیری هاوكاری نێودەوڵەتی سوید بۆ گەشەپێدان رایگەیاند، عێراق ئێستا بووەتە وڵاتێكی داهات مامناوەند و هەموو ئەو هۆكارگەلانەی لەبەردەستن بۆ ئەوەی هاووڵاتییانی وڵاتەكەی بەباشی بژیێنێت.
ئاماژەی بەوەشدا، بۆ دوای قۆناخی بڕینی هاوكارییەكان، بەدڵنیاییەوە پەیوەندییەكانمان لەگەڵ عێراق لەسەرجەم بوارەكانی بازرگانی و كەشوهەوا و كۆچبەرانەوە فراوانتر دەكەین.
سوید لە ماوەی دەیان ساڵی رابردوودا، هاوكارییە داراییەكانی بۆ عێراق بەزیاتر لە 3 ملیار كڕۆن (284 ملیۆن دۆلار) دادەنرێت.
