بەھۆی بەرزبوونەوەی پلەکانی گەرماوە کاتژمێرەکانی دەوام لە فەرمانگەکانی شاری کەرکووک و دەروبەری کەمکرایەوە.
مەروان عانی، بەرپرسی ڕاگەیاندنی پارێزگای کەرکووک ڕایگەیاند، بەھۆی بەرزبوونەوەی پلەکانی گەرماوە کە سەرتاسەری عێراقی گرتووەتەوە، ڕێوشوێنی خۆپارێزی لە دامەزراوە و فەرمانگەکانی شاری کەرکووک و دەوروبەری گیراوەتەبەر.
ئاماژەی بەوەکرد، پلەکانی گەرما لە کەرکووک بەجۆرێک بەرزبووەتەوە کە گەیشتوونەتە ٥٠ پلەی سیلیزی.
وتیشی، بەھۆی بەرزبوونەوەی پلەکانی گەرماوە، بە بڕیاری حکوومەت و ئیدارەی خۆجێیی کەرکووک، دەوامی فەرمی لە فەرمانگەکانی شاری کەرکووک و دەوروبەری کەمکراوەتەوە و لە کاتژمێر ٠٧:٠٠ تا ١٣:٠٠ دەبێت، کە ئەو بڕیارە بە ئامانجی پاراستنی تەندروستی فەرمانبەران دراوە.
ماوەی چەند ڕۆژێکە شەپۆلێکی گەرمای بەتین زۆربەی ناوچەکانی باشوور و ناوەڕاستی عێراقی گرتووەتەوە، بەجۆرێک کە پلەکانی گەرما لەو ناوچانە، ٥٠ پلەی سیلیزی تێپەڕاندووە.
