وەزارەتی بەرگریی تورکیا کوژرانی سەربازێکی وڵاتەکەی لە هەرێمی کوردستان ڕاگەیاند.
بەپێی ڕاگەیەندراوێکی وەزارەتی بەرگری تورکیا کە ڕۆژی چوارشەممە بڵاویکردەوە، ڤەدات زۆربا، سەربازی پیادەی گرێبەست لە ناوچەی ئۆپەراسیۆنی چنگ-قوفڵ لە هەرێمی کوردستان بۆمبێکی چێندراوی پێدا تەقیوەتەوە کە پێشتر لەلایەن گەریلاکانی پەکەکە دانراوە و بەو هۆیەوە بە سەختی بریندار بووە، دوای ئەوەی گوازراوەتەوە بۆ نەخۆشخانە، گیانی لەدەستداوە.
هاوکات ناوەندی ڕاگەیاندنی هێزەکانی پاراستنی گەل-هەپەگە، لە ڕاگەیەندراوێکدا ڕۆژی چوارشەممە بڵاویکردەوە، سوپای تورکیا لە ڕۆژی 20 بۆ 21ی ئایار لە هێرشەکانیدا بۆ سەر گەریلاکانیان لە ناوچەکانی زاپ، مەتین و خواکورک 32 جار چەکی کیمیایی و قەدەخەکراوی بەکارهێناوە و فڕۆکەی جەنگی و تۆپخانەکانیان بە شێوەیەکی بەردەوام بۆردومان و تۆپبارانی ئەو ناوچانەیان کردووە.
