دكتۆر كامەران ژاژڵەیی، پزیشكی پسپۆڕی زانستی خۆراك باسی سوود و زیانەكانی خواردنی گۆشتی قەل دەكات و دەڵێت: ئەو كەسانەی نەخۆشی دەردەشاهانەیان هەیە یا یوریك ئەسیدیان بەرزە یان غەسلی گورچیلەیان بۆ دەكرێت نابێت بیخۆن یا زۆر زۆر كەمی لێ بخۆن.
سوودەكانی گۆشتی قەل:
١ -سەرچاوەیەكی زۆر باشی پڕۆتینە، كە گرنگە بۆ پێكهێنان و چاكردنەوەی ماسولكەكان و جومگە و كڕڕاگە و ئێسقان و پێست و خوێن و شانەكانی تری جەستە.
٢ -خۆپاراستن و چارەسەری كەمخوێنی و كەمی ماددەی بە هۆی بوونی بڕێكی باش لە ماددەی ئاسن و ڤیتامین ( B 12 ) و زینك و پڕۆتین.
٣ -بەهێزكردنی كۆئەندامی بەرگری جەستە.
٤ -یارمەتی كەم كردنەوەی ئەگەری تووشبوون بە هەندێك جۆری شێرپەنجە بە تایبەت شێرپەنجەی میزەڵدان، مەمك ، سیەكان، گەددە بە هۆی بوونی كانزای سلنێومەوە.
٥ -چونكە ( glycemic index )كەمە، بۆ ئەو كەسانەی نەخۆشی شەكرەیان هەیە یارمەتی كۆنتڕۆڵ كردنی نەخۆشی شەكرە ئەدات.
٦ -یارمەتی بەرزكردنەوەی كولیستڕۆڵی باش و دابەزاندنی كولیستڕۆڵی خراپ و كەمكردنەوەی ئەگەری تووشبوون بە نەخۆشیەكانی دڵ ئەدات.
٧ -بەهێزكردنی توانای تەركیز و یادەوەری و یارمەتی خۆپاراستن ئەدات لە نەخۆشیەكانی ئەلزەهایمەر و بیرچوونەوە و پاراستنی تەندروستی مێشك و دەمار.
٨ -یارمەتی زوو نووستن ئەدات بە هۆی بوونی ماددەی تریبتۆفانەوە.
٩ -سەرچاوەیەكی گرنگە بۆ ماددەی كۆلین، ئاسن، مەگنسێوم، پۆتاسێوم، سلنێوم، زینك، ڤیتامین ( B12 . B 6 . B3 ) , سودێوم .
دكتۆر كامەران ئاماژەی بەوەشكردووە، زۆربەی ئەم سوودانەی گۆشتی قەل كاتێ بەردەست ئەبێت كە پێستەكەی نەخورێت و باشتر ئەوەیە پێش لێنانی لێ بكرێتەوە .
زیانەكانی گۆشتی قەل:
ئەو پزیشكی پسپۆڕی خۆراكە ڕاشیگەیاندووە، بە شێوەی گشتی گۆشتی قەل ئەگەر بە بڕی كەم بخورێت زیانی نیە بە مەرجێك بە هۆرمۆنات و عەلەفی ڕێگەپیدراو و بە سروشتی بەخێو كرا بێت و هەروەها لە كاتی لێنانی بڕی زۆر خوێی تێ نەكرێت و پێستەكەی نەخورێت، بەڵام ئەم زیانانەی هەیە :
١ -بەرزكردنەوەی ڕێژەی ماددەی یورێك ئەسید، بۆیە ئەو كەسانەی نەخۆشی دەردەشاهانەیان هەیە یا یوریك ئەسیدیان بەرزە نابێت بیخۆن یا زۆر زۆر كەمی لێ بخۆن.
٢ -ئەوانەی گورچیلەیان وەستاوە و غەسلیان بۆ ئەكرێت یا گورچیلەیان زۆر سستە پێویستە بڕێكی زۆر كەمی لێ بخۆن.
٣ -بە هۆی بوونی ماددەی سودێوم، ئەو كەسانەی نەخۆشی بەرزی فشاری خوێنیان هەیە، پێویستە كەمی لێ بخۆن و تەنها سینگەكەی بێ پێستەكەی بخۆن باشترە.
٤ -ئەو كەسانەی قەڵەون و كێشیان زۆرە پێویستە بڕێكی كەمی لێ بخۆن، تەنها لە كاتی هەندێك ڕێجیم نەبێت، لە ڕێجیمی كیتۆ و لۆكارب نەبێت پێستەكەی ڕێگەپێدراوە، لە ڕێجیمی پڕۆتین و هاشێوەكانی بێ پێستەكەی بخورێت.
