ژەمی بەیانی یەكێكە لە گرنگترین ژەمەكانی ڕۆژ؛ ئەگەر سەرەكیترین ژەم نەبێت؛ و پێویستە ڕۆژانە لە كاتی خۆیدا بخورێت.
د. كامەران ڕەسوڵ ژاژڵەیی، پسپۆڕی زانستی خۆراك دەڵێت: “ئەو توێژینەوە تازانەی باس لەوە دەكەن، كە نەخوارنی ژەمێك سوودی هەیە بۆ تەندروستی ؛ زۆرینەی ڕەهایان پەیوەستن بە كاتی ڕۆژووی زانستی یان ڕۆژووی پچڕ بچڕ، كە جۆری زۆرە و باوترینیان ئەوە كە ماوەی 16 كاتژمێر نابێت هیچ بخورێت تەنها ئاو و چا و قاوەی بێ شەكر ڕێگاپێدراوە ، لەو كاتانەدا ئەو كەسە ژەمی بەیانیان ناخوات بە گوێرەی سیستمە خۆراكیەكە “.
ئاماژەی بەوەشكردووە، تەنانەت لە ڕۆژووی زانستی، ئێستا جۆرێكی تر هەیە، كە پێی دەوترێت ڕۆژووی پچڕپچڕی پێچەوانە یان هەڵگەڕاوە ؛ كە تیادا تەنها ژەمی بەیانی و نیوەڕۆ دەخورێت و دوای كاتژمێر چواری عەسر تەنها ئاو و چا و قاوە ڕێگاپێدراوە.
جەختیشی كردۆتەوە، تا ئەم چركە ساتە زۆرینەی پزیشكان كۆكن لە سەر گرنگی خواردنی ژەمی بەیانی .
د. كامەران ڕوونیشی كردۆتەوە، گشتاندن بۆ هەموو ڕێنمیایەكی تەندروستی و بێ پێدانی زانیاری تەواو و بنەمای زانستی كارێكی چەواشەكاریی و هەڵەیە ؛ دەبێت پزیشك ڕەچاوی هەموو تەمەن و جۆری پیشە و كاتی ئیشكردن و كێش و باڵا و باری تەندروستی و بوونی نەخۆشی درێژخایەن بكات و كورت و پوخت بڵێت لە فڵان سیستمی خۆراكی ئەوە ژەمە یان ئەو خواردنە نابێت بخورێت.
ئەو پسپۆڕەی خۆراك دەپرسێت: “ئاخر كرێكارێكی ماندوو چۆن دەتوانێت بێ خواردنی ژەمی بەیانی ئەركی خۆی بەجێ بهێنێت؟ یان كەسێك كە لاوازە و بەدخۆراكە یان یەكێك چەند جۆرێك دەرمانی نەخۆشی درێژخایەنی هەیە، ناكرێت پێی بڵێیت ژەمی بەیانی مەخۆ”.
