بەپێی ڕاپۆرتە كەشناسییەكان، بارستە هەوایەكی سارد و وشك ناوچەكانی سنووری پارێزگای سلێمانی دەگرێتەوە و تاوەكو ڕۆژی شەممە بەردەوام دەبێت.
ئاراس جەبار، شارەزای كەشناسی بۆ (خەڵك) ڕایگەیاند، لە ئەنجامی زیادبوونی کاریگەری بەرزە پاڵەپەستۆی باکووریی لە ئێوارەی سبەی پێنج شەممەوە ١٨-١-٢٠٢٣ بای وشک و ساردی باکوور و باکووری ڕۆژھەڵات لە ناوچەکانی سنوری سلێمانی و ئیدارەی ڕاپەرین چالاک ئەبێتەوە.
ڕوونیشی كردەوە، خێرایی ئەو با-یە ١٥ تا ٢٥ کم/ كاتژمێر دەبێت و لە ناوچە شاخاوییەکاندا خێرایی زیاتر ئەبێت لەنێوان ١٥ تا ٣٥کم لە كاتژمێرێكدا.
ئاماژەی بەوەشكردووە، ئەو با سارد و وشكە تا بەرەبەیانی ڕۆژی شەممە ٢١-١-٢٠٢٣ بەردەوامی ئەبێت.
ڕاشیگەیاند، پلەکانی گەرما لەو ماوەیەدا بەشێوەیەکی جێگیر ئەمێننەوە، بەڵام لەکاتەکانی شەودا بەھۆی ئەم بایەوە ھەستکردن بە ساردی کەشەکە لەم ناوچانەدا زیاتر ئەبێت.
