فەرماندەی گشتی هێزەکانی سووریای دیموکرات هەڵوەشاندنەوە و ڕادەستکردنی چەک بە حکومەتی سووریا رەتدەکاتەوە و دەڵێت”ئەوە دەرئەنجامی خراپی دەبێت”.
ژەنەڕاڵ مەزڵوم عەبدی، فەرماندەی گشتی هێزەکانی سووریای دیمەکرات(هەسەدە)، لە چاوپێکەوتنێکیدا لەگەڵ کەناڵی ئەل عەرەبیە ڕایگەیاند، بڕیاری ڕادەستکردنی چەک یان چەکدانان بە حکومەتی سووریای نوێ نەدراوە، و بڕیارێکی لەو شێوەیەش نادرێت چونکە ئێمە هێزێکی ڕێکخرا و ڕاهێنراومان هەیە.
ئاماژەی بەوەشداوە، ئێمە دەمانەوێت لەچوارچێوەی هێزێکی تۆکمە بچینە نیو سوپای داهاتووی سووریا، بۆ ئەمەش گفتوگۆی چڕ پێویستە، و گرتنەبەری هەر ڕێگایەکی تر جگە لە دانوستان لەسەر پرسی یەکگرتنەوە هێزەکان بۆ ناو وەزارەتی بەرگری کێشەی گەورەی لێدەکەوێتەوە .
عەبدی ڕوونیشیکردەوە، پێشنیازی پێکهێنانی لیژنەیەکی سەربازی هاوبەشمان کردووە بۆ لێکۆڵینەوە لە بابەتی یەکخستنی هێزەکان، و ئێمە دژی بیرۆکەی بوونی دوو سوپا لە سووریاین، بەڵام ئەوەش دەبێت لەبەرچاوبگیرێت، ئێمە لە 2014 وە کە هێزەکانمان ڕێکخستەوە ئێستا بەهێز و ڕێکخراوین و خاوەنی چەندین دامەزراوەی سەربازین، واتە هێزێکی ڕاهێنراوی ئامادەمان هەیە، نەک گرووپ و هێزی پەرتەوازە.
سەبارەت بە پەیوەندییان بە ئەحمەد شەرع، عەبدی جەختیکردەوە، پەیوەندییەکانمان لەگەڵ سەرکردەکانی ئێستای سووریا تەنها قسە نییە، “ئێمە پەیوەندیەکانمان لەگەڵ محمد جۆلانی بە کردار دیاری دەکەین نەوەك بە قسە”.
