کەشناسی ڕایگەیاند کە هەرێمی کوردستان دەکەوێتە ژێر کاریگەریی بارستە هەوایەکی ساردی جەمسەریی و بەفر و باران دەبارێت.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان ڕایگەیاند، ئەمڕۆ یەکشەممە، ئاسمان ساماڵ و پەڵە هەور دەبێت و لەئێوارەوە دەگۆڕێت بۆ نیمچە هەور.
سەبارەت بە سبەینێ دووشەممەش ڕایگەیاند، لە ئەنجامى هاتنى کاریگەرى شەپۆلێکى بەفر و باران لەگەڵ بارستە هەوایەکى ساردى جەمسەریى ناوچەکەمان دەکەویتە ژێر کەشێکى نا سەقامگیرەوە.
ڕوونیشیکردەوە کە لە بەرەبەیانەوە ئاسمانى هەرێم هەور و سارد دەبێت و لە ناوچە سنوورییەکان بەفر دەبارێت و لەگەڵ زیادبوونى کاریگەرى ئەم شەپۆلەشدا بارانبارین سەرجەم ناوچەکان دەگرێتەوە.
لە ڕاگەیەندراوەکەی کەشناسیدا هاتووە کە ئەگەری بەفربارین لەو ناوچە شاخاوییانە زیاترە لە بەرزییەکانیان دەگاتە سەروو 1400 مەتر و لە سەنتەرى پارێزگاى دهۆکیش ئەگەرى بەفربارین هەیە.
کەشناسی ڕاشیگەیاند، کاریگەرى ئەم شەپۆلە تا شەوى دووشەممە بەردەوام دەبێت و پلەی گەرماش 5-8 پلە دادەبەزێت.
بەرزترین پلەکانی گەرمای پێشبینیکراو بە پلەی سیلیزی :
هەولێر : 11 پلەى سیلیزى
سلێمانی : 8 پلەى سیلیزى
دهۆک : 4 پلەى سیلیزى
کەرکووک : 13 پلەى سیلیزى
زاخۆ : 6 پلەى سیلیزى
هەڵەبجە : 6 پلەى سیلیزى
حاجی ئۆمەران: 0 پلەى سیلیزى
سۆران: 5 پلەى سیلیزى
گەرمیان : 14 پلەى سیلیزى
