بەهۆی ڕێگری لە ناردنی هێلكەی كێڵگە پەلەوەرییەكانی كوردستان بۆ ناوچەكانی دیكەی عێراق، خستنەڕووی ئەو بەرهەمە خۆراكییە لە بازاڕەكانی هەرێم زیاد دەبێت و بەهۆیەوە نرخەكەی دادەبەزێت.
ئاکۆ محەمەد، نوێنەری خاوەن پرۆژەکانی بەرهەمهێنانی هێلکە ڕایگەیاندووە، ڕێگە نادرێت بەرهەمی هێلکە لە هەرێمی کوردستانەوە بچێتە ناوەڕاست و باشووری عێراق.
ڕاشیگەیاند، ماوەی 15 ڕۆژە ڕێگای هەناردە كردنی هێلکەی سلێمانی بۆ ناوەڕاست و باشووری عێراق گیراوە و زەرەرمەندی یەکەم لە ڕێگری کردن لە هەناردەی هێلکەی هەرێم خاوەنی کێڵگە پەلەوەرییەکانن.
ئاشكراشی كردووە، بەرهەمی ڕۆژانەی هێلکە لە هەرێمی کوردستان لە پێداویستی ناوخۆ زیاترە
لە ئێستادا لە بازاڕەكانی هەرێم 5 هێلكە بە هەزار دینارە و بە زیادبوونی بڕی هێلكەش لە بازاڕەكانی نرخەكەی زیاتر دادەبەزێت.
