وەزارەتی كار و كاروباری كۆمەڵایەتی حكومەتی هەرێم بڕیاریدا بە قەدەغەكردنی نیشاندانی سزادراوان و بەساڵاچووان و منداڵانی ناو خانەكان لە كەناڵەكانی ڕاگەیاندن و ئەنجامدانی چاوپێكەوتن لەگەڵیان.
بەپێی سێ گشتاندن، كە وەزارەتی کار و کاروباری کۆمەڵایەتی بە واژۆی كوێستان محەمەد، وەزیری وەزارەتەكە دەریكردووە، تایبەتە بە چاکسازییەکان و بەساڵاچووان و خانەکانی سەر بە چاودێری و گەشەپێدانی کۆمەڵایەتی.
وەك لە گشتاندنەكاندا هاتووە، نیشاندان یان چاوپێكەوتن لە كەناڵەكانی ڕاگەیاندن و سۆشیال میدیا لەگەڵ ئەو چین و توێژانە قەدەغەیە و ڕێگەش نادرێت بە هیچ هونەرمەند و ڕۆژنامەنووس و كەسانی ناو سۆشیال میدیا بە مەبەستی بانگەشە و ڕیكلام لەناو خانەكان ڤیدیۆ تۆمار بكەن.
جەختیشكراوەتەوە، هەر كەسێك سەرپێچی بكات، ڕێكاری یاسایی و كارگێڕی لەدژ دەگیرێتەبەر.
