نرخی نەوتی خاو و برێنت لە بازاڕەکانی جیهان بەردەوامن لە بەرزبوونەوە و بەرمیلێک نەوتی برێنت 81 دۆلاری تێپەڕاند.
ئەمڕۆ دووشەممە، نرخی بەرمیلێک نەوتی برێنت بەرزبووەوە بۆ 81 دۆلار و 31 سەنت، لە کاتێکدا دوو ڕۆژی ڕابردوو بە 79 دۆلار و 76 سەنت فرۆشرا.
هاوکات یەک بەرمیل نەوتی خاوی ئەمریکا بەرزبووەوە بۆ 77 دۆلار و 13 سەنت، لە کاتێکدا دوو ڕۆژی ڕابردوو بە 76 دۆلار و 57 سەنت مامەڵەی پێوەکرا.
هاوکات هەر ئەمڕۆ یەک ئۆنسە زێڕ بە دوو هەزارو 687 دۆلارە.
ئابووریناسان باس لەوە دەکەن، خواستی وڵاتی چین بۆ کڕینی نەوتی خاو بە بڕێکی ئێجگار زۆر ناڕێکی لە بازاڕدا دروستکردووە و نرخی نەوتی بەرزکردووەتەوە.
ئەوەش لەکاتێکدایە، پێشتر بەهۆى خاوبوونەوەى ئابوورى چین، پێشبینیەکان بۆ خواست لەسەر نەوت لەلایەن رێکخراوى ئۆپێک و ئاژانسى وزەى نێودەوڵەتییەوە کەمکرایەوە.
