سەرۆكی هاوپەیمانی دەوڵەتی یاسا ڕایدەگەیەنێت، عێراق بە پێکهێنانی حکومەتی سودانی قەیرانی سیاسیی تێپەڕاندووە و دەشڵێت: ” حکومەتی داهاتووش بەرهەمدار دەبێت”.
نوری مالكی، سەرۆكی هاوپەیمانی دەوڵەتی یاسای و سەركردە لە هاوپەیمانی ئیدارەی دەوڵەت بۆ پێكهێنانی حكومەت بە سەرۆكایەتی سودانی ڕایگەیاندووە، “عێراق دوای هەڵبژاردن تووشی قەیرانێکی سیاسی خنکێنەر بوو، بەڵام سوپاس بۆ خوا ئێمە ئەو قەیرانەمان تێپەڕاند و حکومەتمان پێکهێنا، ئێستاش پشتیوانی هەموو هێزە سیاسییەکانی هەیە”.
بەپێی هەواڵێكی ئاژانسی هەواڵی (میهر)ی ئێرانی، مالكی لەكاتی كۆبوونەوەی لەگەڵ ئەحمەد سەفدی، سەرۆكی پەرلەمانی ئەردەن و شاندی یاوەری وتویەتی، “عێراق توانای ئەوەی هەیە دەست بە گەشەسەندن و بنیاتنانەوە بكاتەوە بەپێی ئەو پێگانەی هەیەتی”.
ئاماژەی بەوەشكردووە، دۆخی داهاتوو بەرهەمدار دەبێت و هیوامان بەوەیە سەركەوتووبین لە بەدیهێنانی سەقامگیری سیاسی و ئابووری لە عێراقدا ئەوەش لەڕێگەی قوڵكردنەوەی پەیوەندییەكان لەگەڵ وڵاتانی دراوسێ.
