*پ.ی.د.ئەمیر خوداکەرەم زەند
توێژینەوە زانستییەکان جەخت لەسەر ئەوە دەکەنەوە کە گۆڕانکارییە سیاسی و ئابوورییەکان کاریگەریی راستەوخۆ و ناڕاستەوخۆیان لەسەر تێکچوونی شیرازەی خێزان و کۆمەڵگە هەیە، ئەمەش دوابەدوای ئەوە دێت کە تاک و خێزان لە ململانێیەکدان لەگەڵ خودی خۆیان و ئەو ئاڵنگارییانەی کە لە نێو خێزان و کۆمەڵگەدا رووبەڕوویان دەبێتەوە و دەبێتە مایەی تێکچوونی شیرازەی خێزان، ئەمەش وا دەکات لە نێو کۆمەڵگەدا کۆمەڵێ کێشە زیاد بکات، لەوانە تاوان و کوشتن و دزیکردن و لادان لەڕووی بڵاوبوونەوەی خراپە و خراپەکردن. هۆکارى ئەمانەش دەگەڕێتەوە بۆ ئەوەى کت و پڕ دۆخێکی سیاسیی ناهەموار دێتە ئاراوە.
کۆمەڵگەی کوردی لە ئێستادا، رووبەڕووی نەهامەتی و بێ مووچەیی و هەژاری بووەتەوە و لە لایەک هێرش و ترسی دوژمنان و داگیرکەرانە و لەلایەکی ترەوە بێ مووچەیی و بایکۆت و شەڕی دەروونی تەنگیان پێهەڵچنیوە. گەنجیش ئەم دۆخە دەبینێ پەنا بۆ هاوسەرگیریش نابات، لەهەر لایەکەوە گەنگەشە و باسی بکەی کارەساتە و لێکتێنەگەیشتنی تەواو دروست دەبێت لە نێوان هاووڵاتی و دەسەڵاتدا.
ئەمڕۆ رۆژی زیرەکیی پیشەسازی و تەکنۆلۆژیایە، پێداویستییەکانی مرۆڤ بۆ ژیان بێ کۆتایە و ئەمڕۆ شتێکە و سبەی شتێکی ترە و ناوەستێ، بۆیە کێشەی ئابووریی وا لە تاکی نێو خێزان دەکات کە نامۆ و گۆشەگیر بن و خێزانیش ئەو کۆنترۆڵە لە دەست دەدات و ئەمەش کارێگەریی خراپ دروست دەکات لە رەفتار و مامەڵەکردن، بگرە دورکەوتنەوە دروست دەبێ لە نۆرم و داب و نەریتی کۆمەڵایەتی.
خێزان یەکەیەکی کۆمەڵایەتییە و بناغەیەکی رەسەنی بێ کۆتایە و ناکرێ لەو نێوەندەدا پێگەیاندنی سیاسی نەبێ، بەم شێوەیە بڕوا خۆشەویستی و ئینتیمای تاک بۆ خاک و نیشتیمان لاواز و سست و بێ مانا دەبێت، هەموو نەهامەتییە سیاسییە کۆمەڵایەتییەکان دەخەنە ئەستۆی دەسەڵات و حکومەت، بۆیە کاریگەریی سیاسی، خۆی لەخۆیدا پەیوەندییە لە نێوان هاووڵاتی و حکومەتدا، هەردووک پێکەوە داواکاریان هەیە بۆ بەدیهێنان و پراکتیزەکردن و پێداویستی و گەیشتن بە ئامانج، ئەمە گرنگە بزانرێت و کاری لەسەر بکرێت، لە کۆتاییدا دەڵێن هەموو کردارێکی سیاسی و کۆمەڵایەتی بە باش و خراپ، پەرچەکردارێکی چاوەڕواننەکراو چاوەڕوانێتی و روودەدات بۆ هەموو جومگەکانی ژیان لە کۆمەڵگەدا.
*مامۆستای زانکۆی سلێمانی
