بەڕێوەبەرایەتی گشتی تەندروستی سلێمانی ڕایدەگەیەنێت، لەڕۆژانی پشوودا سەرجەم نەخۆشخانەکانی پارێزگای سلێمانی بەشێوەی ئیشکگر (۲٤) کاتژمێر کراوەدەبن.
سامان شێخ لەتیف، بەڕێوەبەری ڕاگەیاندنی تەندروستی سلێمانی بۆ (خەڵك) ڕایگەیاند، بەمەبەستی ئامادەکاری و بەردەوامبوون لە پێشکەشکردنی خزمەتگوزاری تەندروستی لەڕۆژانی پشوودا، جگە لەنەخۆشخانە فریاکەوتنەکان، سەرجەم نەخۆشخانە و سەنتەرە گرنگەکانی وەك سەنتەری فریاکەوتنی خێرا و سەنتەری شوشتنی گورچیلە و سەنتەری چارەسەرکردنی شێرپەنجە بەتیشك و تیمەکانی چاودێری تەندروستی، پشکنینی ئاو، نەخۆشیە گوازراوەکان بەردەوام دەبن لەپێشکەشکردنی خزمەتگوزاری تەندروستی بەشێوەی ئێشکگر .
وتیشی، “داوا لەهاووڵاتیان دەکەین لەکاتی بوونی هەر حاڵەتێکی کتوپڕدا دەتوانن پەیوەندی بە سەنتەری فریاکەوتنی خێرای تەندروستی ژمارە 122 بکەن”.
بەپێی بڕیاری حكومەتی هەرێم لە سبەینێ چوار شەممەوە 25-12-2024 تاوەكو ڕۆژی پێنج شەممە 2-1-2025 بەبۆنەی یادی لەدایكبوونی پێغەمبەر عیسا (س.خ) و سەری ساڵی نوێوە پشووی فەرمی دەبێت.
